davam.az - BÜTÖV AZƏRBAYCAN ADINA! > Gündəm, DAVAMın yazıları > İnam – İdeal – Ehkam
İnam – İdeal – Ehkam |
|
İnam insandan başlayır, hər hansı inanılan nəsnədə təsdiqlənir – insan həqiqətə yetir.
*** Başqasını özgə bilib ona inana bilmərsən, onu özün bilib inana bilərsən: inanmaq üçün yadlıq ölməlidir! *** İnsan ideallaşdırmağa məcburdur, ona görə ki, inanmağa məcburdur. *** İdeal – insan yaradıcılığıdır: insan yaradıcılığı olmayan ideal – yoxdur. *** “Dünyada ideal insan yoxdur” demək – dünyaya, insana inamsızlıqdır, idealsızlıqdır. *** Dünyanın, insanın mahiyyəti – idealdır: mahiyyətə bərabər olan – idealdır. Dünya da, insan da hər an ideala can atır. *** İnsanın istəyi – əzəli, əbədi, kamil, dəyişməz ideal axtarıcılığı, yaradıcılığıdır. *** Allah – insanın din yoluyla, Mütləq – insanın inam yoluyla ən böyük ideal yaradıcılığıdır. *** İdeal – həqiqət, inam ölçüsüdür. Onun dərki hər kəsin idraki gücündən asılıdır. *** İdeal – ruhani hadisədir, yaradıcılıqdır. İnsanın istəyi – onu gerçəkliyə gətirməkdir. *** “İnsan nəyəsə inanmalıdır” demək – insanın hər sayaq cəfəngiyyata inamına haqq qazandırmaqdır. *** Yalnız həqiqi olana inanmaq gərək – bunun üçün həqiqət dərk edilməlidir. *** Yanılmaq – idrakın yarıtmazlığıdır: idrak inamı yarıtmayanda – insan aldanır. *** İdeal – dərklolunan, yetilən olmalıdır. Dərk olunmayan, yetilməyən ideal insanın nəyinə gərəkdir? *** Dərk edilməyən, yetilməyən ideal – inam yox, ehkam və qorxu qaynağıdır. *** İdeal olmaq – insanlığa uyğun olmaq, insan üçün var olmaqdır. *** İdealın ehkamlaşdırılması – insanlığın faciəsidir. *** İdeal – ehkama qarşıdır. Ona görə ki, ideal – mənəvi azadlıq, ehkam – mənəvi asılılıqdır. *** İdeal – idrakın məhsuludur. Bu baxımdan, idrakın yenilənməsinə uyğun olaraq ideal da yenilənməlidir. *** Ali idraka uyğun olmayan ideal – geridəqalmışlıq yaradır. *** Ehkama çevrilən, ehkam yaradan ideal – idrakı öz asılılığında saxlayır – cəhalət törədir. *** İnsanlığa uyğun olmayan hər şey – cəhalətdir. *** İdeal – həqiqət yönündən idrak vasitəsilə hər an cilalanmalıdır. *** Dəyişən, yenilənən, insan idrakından geri qalan, çağdaşlığa, gələcəyə uyğun olmayan ideal – ölür. Bu, əslində ehkamın ölməsidir. Yolruh ATALI Geri dön |