davam.az - BÜTÖV AZƏRBAYCAN ADINA! > Xəbərlər, Siyasət > Azərbaycanda daha dörd nəfərin prezidentliyə namizədliyi qeydə alınıb
Azərbaycanda daha dörd nəfərin prezidentliyə namizədliyi qeydə alınıb |
|
Mərkəzi Seçki Komissiyasının (MSK) bu gün keçirilən iclasında Komissiyanın katibi Arifə Muxtarova namizədliyi irəli sürülən şəxslər -
Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyev, Müasir Müsavat Partiyasının (MMP) sədri Hafiz Hacıyev, Azərbaycan Sosial-Demokrat Partiyasının (ASDP) sədri Araz Əlizadə və Milli Dirçəliş Hərəkatı Partiyasının (MDHP) sədri Fərəc Quliyev ayrı-ayrılıqda məlumat verib. MSK katibi əlavə edib ki, namizədliyi təsdiq olunmuş bu şəxslərin təqdim etdiyi imza vərəqələri yoxlanıb, onların namizədliyinin qeydə alınması üçün hüquqi əsasların olması müəyyən edilib. MSK-nın İşçi qrupunun rəhbəri İlham Məmmədov isə deyib ki, BAXCP sədri Qüdrət Həsənquliyev MSK-ya 92 dairədən 44 111 imza təqdim edib, onlardan 40 324 etibarlı hesab olunub. MMP sədri Hafiz Hacıyev isə MSK-ya qeydə alınması məqsədilə 44 900 imza təqdim edib, bunlardan 40 286-sı etibarlı sayılıb. ASDP sədri Araz Əlizadə tərəfindən təqdim olunan 44 550 imzadan 40 250-si etibarlı sayılıb. Namizədliyinin qeydə alınması üçün MDHP sədri Fərəc Quliyev isə MSK-ya 43 333 imza nümunəsi təqdim edib, bunlardan 40 172 etibarlı sayılıb. Arifə Muxtarova əlavə edib ki, seçki qanunvericiliyinə görə, prezidentliyə namizədin qeydə alınması üçün onun müdafiəsi məqsədilə ən azı 40 min imza toplanmalıdır. Bu səbəbdən də adıçəkilən şəxslərin namizədliyinin qeydə alınması məqsədəuyğun hesab edilir. MSK açıq səsvermə yolu ilə adıçəkilən şəxslərin namizədliyini qeydə alıb. MSK Azərbaycan Liberal Demokrat Partiyasının (ALDP) sədri Fuad Əliyevin isə namizədliyini qeydə almayıb. Komissiyanın İşçi qrupunun rəhbəri İlham Məmmədov deyib ki, onun tərəfindən MSK-ya 44 286 imza təqdim olunub, imzalardan 8 186-sı doğru olmadığından yoxlama prosesi dayandırılıb. MSK katibi Arifə Muxtarova bildirib ki, belə olan halda F. Əliyev 40 000-lik imza baryerini keçə bilməyib. Bu da qanunvericiliyə əsasən onun namizədliyinin qeydə alınmasını mümkünsüz hesab edir. MSK Fuad Əliyevin namizədliyini qeydə almayıb. Yığıncaqda MSK-nın 9 sentyabr tarixli iclas protokolu təsdiq olunub. Həmçinin, bəzi dairə seçki komissiyalarının tərkibinə dəyişiklik edilib. Qeyd edək ki, buna qədər MSK tərəfindən prezident İlham Əliyevin, Ümid Partiyasının sədri İqbal Ağazadənin və Milli Məclisin deputatı Zahid Orucun namizədliyi qeydə alınıb. Ümumilikdə indiyədək 21 nəfərin namizədliyi təsdiqlənib. Cəmil Həsənli, Əhməd Oruc, Sərdar Məmmədov (Sərdar Cəlaloğlu), Əli Əliyev, İlyas İsmayılov, İlqar Məmmədov (ReAL hərəkatı) da imza vərəqələrini MSK-ya təqdim ediblər. “Milli Şura” Təşəbbüs Qrupu tərəfindən namizədliyi irəli sürülən Rüstəm İbrahimbəyovun namizədliyi isə təsdiq olunmayıb. Üç nəfər - Əli İsa Ağaevli, İlqar Məmmədov (İlqar Altay), Qüdrət İsaqov öz təşəbbüsləri ilə seçkidə iştirakdan imtina edib. Elşən Həsənov, Yusif İsmayılov, Rauf Quliyev, Hidayət Rüstəmbəyli, Ərəstun Oruclu isə tələb olunan 40 min imzanı toplaya bilməyiblər. Azərbaycanda prezident seçkiləri oktyabrın 9-da keçiriləcək. Geri dön |