davam.az - BÜTÖV AZƏRBAYCAN ADINA! > Gündəm, Mədəniyyət > Dövlət Gənc Tamaşaçılar Teatrının kollektivi Həştərxan və Kalmıkiyada qastrolda olub
Dövlət Gənc Tamaşaçılar Teatrının kollektivi Həştərxan və Kalmıkiyada qastrolda olub |
|
Azərbaycan Dövlət Gənc Tamaşaçılar Teatrının kollektivi Həştərxan Dövlət Gənc Tamaşaçılar və Kalmıkiya Milli Dram Teatrlarından qastrol səfərindən qayıdıb. Teatrın mətbuat xidmətindən verilən məlumata görə, sentyabrın 30-dan oktyabrın 7-dək davam edən qastrol səfərində teatr 3 tamaşa ilə çıxış edib. Oktyabrın 1-i və 2-də kollektiv Həştərxan Dövlət Gənc Tamaşaçılar Teatrında Rəsul Rzanın “Ana qaz” əsəri əsasında hazırlanmış alleqorik bir hissəli pantomim-tamaşa ilə azyaşlı tamaşaçıların qarşısına çıxıb.
Oktyabrın 4-dən 6-dək teatrın kollektivi Kalmikiya Respublikasının Elista şəhərində yerləşən B.Basanqov adına Milli Dram Teatrında Rəsul Rzanın “Ana qaz”, İşveç dramaturqu “Lars Nurenin “Müharibə” və alman yazıçısı və ssenaristi Patrik Züskindin “Kontrabas” əsərləri əsasında hazırlanmış tamaşalarla çıxış ediblər. Qastrol səfərinin bağlanış mərasimində çıxış edən Kalmıkiya Respublikasının mədəniyyət naziri xanım Amulanqa Uçurova, elm və təhsil nazirinin müavini Raisa Dyakiyeva, Teatr Xadimləri İttifaqının sədri Tatyana Mixeyeva və başqaları qastrol səfərinin uğurundan danışaraq, kollektiv üzvlərinə fəxri diplomlar təqdim ediblər. Azərbaycan Dövlət Gənc Tamaşaçılar Teatrının direktoru, əməkdar artist Mübariz Həmidov və teatrın baş rejissoru, əməkdar incəsənət xadimi Bəhram Osmanov çıxış edərək Rusiya və Azərbaycan Teatrları arasındakı qarşılıqlı yaradıcılıq əlaqələrinin bundan sonra da davam edəcəyini vurğulayıb. Teatrdan bildiriblər ki, noyabrda Həştərxan Dövlət Gənc Tamaşaçılar Teatrı, gələn ilin may ayında isə Kalmıkiya Milli Dram Teatrının ölkəmizdə qastrol səfərlərinin həyata keçirilməsi üçün razılıq əldə olunub. Geri dön |