davam.az - BÜTÖV AZƏRBAYCAN ADINA! > Gündəm, Hərb, Mədəniyyət > Milli Qəhrəman Gültəkin Əsgərovaya həsr olunmuş sənədli filmin təqdimatı olub
Milli Qəhrəman Gültəkin Əsgərovaya həsr olunmuş sənədli filmin təqdimatı olub |
|
26 İyun Silahlı Qüvvələr Günü münasibətilə start götürən “Milli Qəhrəmanlar” sənədli filmlər həftəsi çərçivəsində iyunun 20-də Nizami Kino Mərkəzində Milli Qəhrəman Gültəkin Əsgərovaya həsr olunmuş “Gültəkin” sənədli filminin təqdimatı keçirilib.
Tədbiri Bakı Şəhər İcra Hakimiyyəti başçısı Aparatının Kino Xidməti İdarəsi təşkil edib. Tədbirdə Milli Qəhrəman Gültəkin Əsgərovanın ailə üzvləri, dostları, Ombusman Aparatı mətbuat xidmətinin rəhbəri Zemfira Məhərrəmli, deputat Qənirə Paşayeva, vokalçı, musiqişünas Ramil Qasımov, hərbi diktor Şəmistan Əlizamanlı, QHT təmsilçiləri, mədəniyyət işçiləri və KİV nümayəndələri iştirak ediblər. Tədbir bəstəkar Sevda İbrahimovanın bəstələdiyi və Ramil Qasımovun ifa etdiyi “Gültəkin” kompozisiyası ilə başlanıb. Bakı Şəhər İcra Hakimiyyəti başçısı Aparatının Kino Xidməti İdarəsinin rəis müavini Cəmil Xəlilov Milli Qəhrəman Gültəkin Əsgərovanın keçdiyi döyüş yolundan, göstərdiyi şücaətlərdən danışıb: “Gültəkin Əsgərova hərbi həkim kimi onlarla insanın həyatını xilas edib, 1992-ci iyunun 20-də Aranzəmin-Naxçıvanik istiqamətində gedən ağır döyüşlərdə öz xidməti borcunu yerinə yetirərkən qəhrəmancasına həlak olub, şəhidlik zirvəsinə ucalıb. Ölümündən sonra Milli Qəhrəman adına layiq görülüb. Bu gün Gültəkin Əsgərovanın xatirə günüdür, onun ölümündən 22 il ötür”. Qənirə Paşayeva Milli Qəhrəmanlara həsr olunan filmlərin, kitabların ictimaiyyətə təqdim olunmasını müsbət dəyərləndirərək qeyd edib ki, gənc nəslin tərbiyə olunmasında bu cür tədbirlərin böyük rolu var. Zemfira Məhərrəmli, Şəmistan Əlizamanlı, Kəmalə Musazadə və başqaları da öz çıxışlarında Gültəkin Əsgərovanın şücaətlərindən bəhs ediblər. Tədbir çərçivəsində Gültəkin Əsgərovanın anası, “Şəhid Anaları” Cəmiyyətinin sədri, pedaqogika üzrə fəlsəfə doktoru Rəfiqə Əsgərovanın “Gültəkin zirvəsi” adlı kitabının təqdimatı da keçirilib. Sonda rejissor Kamalə Musazadənin çəkdiyi “Gültəkin” sənədli filmi nümayiş olunub. Geri dön |