davam.az - BÜTÖV AZƏRBAYCAN ADINA! > Çap səhifəsi > Orta məktəbi qurtarmadan qızıl medal aldılar

Avropa Azərbaycan Məktəbinin XI sinif şagirdlərindən ikisi orta məktəbi qurtarmadan qızıl medalla təltif olunmuşlar:Günay Anar qızı Məmmədova və Fərid Cavanşir oğlu Muradov Respublika Fənn Olimpiadasında tarix fənni üzrə bilik yarışında qalib gələrək qızıl medala layiq görülmüşlər.
Bu, Günay Məmmədovanın bir tədris ili ərzində qazandığı III olimpiada medalıdır. O,keçən ilin noyabrında Türkiyənin Antalya şəhərində keçirilən türkdilli məktəblilərinin Fənn Olipiadasından Vətənə 2 medalla qayıtmışdı. Onlardan biri Günayın ingilis dili biliyinə verilən qızıl medal, ikincisi isə riyazi biliklərinə görə aldığı gümüş medaldır.
Günay Məmmədova 2014-cü ildə Azərbaycan dili və ədəbiyyatı fənni üzrə Respublika Fənn Olimpiadasının qalibi olmuşdur.
Məktəbdə hamı Günay Məmmədovanın məktəbi qızıl medalla qurtaracağına inanır. Bu, Günayın son tədris ilində qazanacağı dördüncü medal ola bilər.
Günayın sinif yoldaşı Fərid Cavanşir oğlu Muradov hələ X sinifdə oxuyarkən müxtəlif mətbu orqanlarında çap olunmuş elmi və elmi-publisistik yazıları kitab şəklində çap etdirərək,oxuculara çatdırılmışdır.
Fərid Muradov keçən il Respublika Fənn Olimpiadasında tarix fənni üzrə IV yeri tutmuşdu. Birinciliyə həmişə israrlı olan Fərid Muradov 2015-ci il olimpiadasına keçənilkindən daha yaxşı hazırlaşaraq, qızıl medal almışdır.
Günay və Fəridlə bir sinifdə oxuyan Əsmər Maşallah qızı Quliyeva Azərbaycan dili və ədəbiyyatı fənni üzrə Olimpiada yürüşündə III pilləyə çıxmışdır. Hələlik bürünc medalla kifayətlənməli olan Əsmər Maşallah qızı Quliyeva dərs ilinin sonunda on bir illik əlaçılığını təsdiq edəcək ilk qızıl medalını alacağına əmindir.
***
Avropa Azərbaycan Məktəbi bayram içindədir. Cəmi dörd il bundan əvvəl yaradılmış məktəbin ilk buraxılış sinfinin üç şagirdinin Pespublika Fənn Olimpiadasında qalib gəlməsi hamını sevindirir.

Nazim Nəsrəddinov,
Azərbaycan Respublikasının əməkdar müəllimi,
Avropa Azərbaycan Məktəbinin Azərbaycan dili və ədəbiyyatı müəllimi.

21.04.2015.