davam.az - BÜTÖV AZƏRBAYCAN ADINA! > Çap səhifəsi > Ruhaninin köməkçisi: -Ölkənin etnik çeşitliliyi bir fürsətdir

İran prezidentinin milli və dini azlıqların işi üzrə köməkçisi Əli Yunisi aprelin 27-də Kərəc şəhərində keçiriklən bir toplantıda çıxış edərək ölkədəki etnik durumdan danışıb.
Əli Yunisi deyib ki, ölkənin etnik çeşitliliyi təhdid yox, bir fürsətdir: “Etnik çeşitliliyi İran üçün əvəzsiz bir fürsətdir. Çünki insan cəmiyyətinin gözəlliyi də elə həmin rəngarəngliyə görədir. Biz ölkəmizdəki bu etnik rəngarəngliyindən istifadə etməli, bu fürsəti bir təhdidə çevirməməliyik. Bu gün bölgədə dini müharibələrdən daha böyük bir təhlükə yoxdur. İsrail və Amerika da öz mənafelərini qorumaq üçün şiə-sünni arasındakı ixtilafları qızışdırmağa çalışırlar.

Hesab edirik ki, heç bir xalq başqa bir xalqdan üstün deyil. Çünki onların hamısı, milli mənsubiyyətindən və dilindən asılı olmayaraq Allahın yanında bərabərdir. Rəsmilərimiz unutmamalıdır ki, onlara səs verənlər ayrı-ayrı etnik mənsubiyyəti və dili olan insanlardır. Elə buna görə də onların çiyinlərinə ağır məsuliyyət düşür. Rəsmilərimiz insanlarımızın qədrini bilməli, unutmamalıdırlar ki, hazırda daşıdıqları vəzifə və postu həmin insanların verdiyi səsi sayəsində qazanıblar. Bu gün hər kəs ölkədəki etnik qruplar və dini azlıqlar arasında nifaq salmağa çalışsa, bilərəkdən və ya bilməyərəkdən düşmən cəbhəsində qərarlaşmış olur”.

Qeyd edək ki, Əli Yunisinin vaxtaşırı çıxış və bəyanatlarında etnik rəngarəngliyinin ölkə üçün bir fürsət sayılması tez-tez vurğulansa da, bu gün İranda ana dilində təhsil hüququnu tələb etdiyinə görə onlarla azərbaycanlı dinc fəal əsassız ittihamlarla tutularaq həbsdə saxlanılır.