davam.az - BÜTÖV AZƏRBAYCAN ADINA! > Hərb > Vaşinqtonda Azərbaycan-ABŞ hərbi məsləhətləşmələri keçirilib
Vaşinqtonda Azərbaycan-ABŞ hərbi məsləhətləşmələri keçirilib |
|
Azərbaycan Müdafiə Nazirliyinin beynəlxalq hərbi əməkdaşlıq şöbəsinin rəhbəri general-mayor Ramiz Nəcəfovun başçılıq etdiyi nümayəndə heyəti Vaşinqtonda səfərdə olub.
Azərbaycanın ABŞ-dakı səfirliyinin mətbuat xidmətindən verilən məlumata görə, nümayəndə heyəti Azərbaycan-ABŞ strateji əməkdaşlığının həlledici elementi olan müdafiə məsələlərinə dair ikitərəfli məsləhətləşmələrdə iştirak edib. Hər il keçirilən məsləhətləşmələrdə məqsəd ikitərəfli hərbi əməkdaşlığa dair məsələləri və gələcək planları müzakirə etməkdir. Qeyd edək ki, Azərbaycanla ABŞ arasında müdafiə və təhlükəsizlik sahəsində əməkdaşlığın formal çərçivəsinin yaranmasından 10 il ötür. İki dövlət arasında mövcud olan fəal müdafiə və təhlükəsizlik əməkdaşlığına 2002-ci ildə qanuni status verilib və keyfiyyətcə yeni səviyyəyə qaldırılan bu əməkdaşlıq iki dövlət arasında münasibətlərin daha da möhkəmlənməsini və Azərbaycanın regionda artan rolunu özündə əks etdirir. Azərbaycan ABŞ-ın dünyanın həyati əhəmiyyətə malik olan regionunda etibarlı dostu və beynəlxalq terrorizmlə mübarizədə və regionun təhlükəsizliyinin qorunmasında güclü müttəfiqidir. Azərbaycan 11 sentyabr terror aktlarından dərhal sonra terrorla müharibədə ABŞ-a yardımını təklif edən ilk ölkələrdən olub. Azərbaycan Əfqanıstandakı əməliyyatları dəstəkləmək üçün öz hava məkanını və hava limanlarını təklif edib. Bu gün Azərbaycanın strateji əhəmiyyəti getdikcə artır və ölkə Əfqanıstandakı NATO əməliyyatlarını hərtərəfli dəstəkləyir. Azərbaycan əsgərləri Əfqanıstanda, Balkanlarda və İraqda ABŞ əsgərləri ilə çiyin-çiyinə xidmət ediblər. Şimal Bölgü Şəbəkəsinin əsas hissəsi kimi, Azərbaycan Əfqanıstandakı ABŞ və koalisiya qüvvələrinin 40 faizinin təchizatı üçün quru, hava və dəniz tranzitini təmin edir. Hər il on minlərlə ABŞ və koalisiya qüvvələri Azərbaycanın hava məkanından keçərək Əfqanıstana gedir və qayıdır. Azərbaycan və ABŞ arasında müdafiə və təhlükəsizlik sahəsində əməkdaşlıq artdıqca, Əfqanıstan bu iki ölkə arasında dərin və strateji tərəfdaşlığın nümunəsinə çevrilir. Geri dön |