davam.az - BÜTÖV AZƏRBAYCAN ADINA! > Çap səhifəsi > Təbrizdə azərbaycanlı fəal Hüseyn ƏliMəhəmmədinin həbsinə etiraz edildi

Azərbaycanlı fəallar Hüseyn Əliməhəmmədi və Taha Kirmaninin barəsində çıxarılan ağır həbs qərarı Milli Hərəkat fəalları tərəfindən etirazla qarşılanıb.
Təbrizdə Hüseyn ƏliMəhəmmədinin həbs edilməsinə etiraz olaraq şəhərdə Bildirilər yayılıb.

Azərbaycanlı fəallar şəhərin müxtəlif yerlərində divarlara Bildirilər yapışdırıb və H.Əliməhəmmədinin günahsız olduğunu bildirərək onun həbs edilməsinə kəskin etiraz ediblər.

Adını çəkdiyimiz fəallara qarşı verilən həbs cəzası sosial şəbəkələrdə də geniş etiraz və müzakirələrə səbəb olub.

Qeyd edək ki, Təbrizin inqilab məhkəməsi Hüseyn Əliməhəmmədi və Taha Kirmanini islam müqəddəsatını təhqir etmək və islam hökumətinə zərbə vurmaq məqsədi ilə ictimai mülkiyyəti yandırmaqda ittiham edib və hər birini 10 həbs cəzasına məhkum edib. Məhkəmə tərəfindən elan olunan mətndə müttəhimlərin müqəddəsata təhqiri buna əsaslanır ki, İran bayrağının üzərində “Allah” sözü var və həmin bayraq müttəhimlər tərəfindən yandırılıb. Lakin fəallar bu ittihamı təmami ilə əsassız sayıb və rədd ediblər.

Adını çəkdiyimiz fəallar bundan öncə “Susma” dərgisi və “Susuz göl” veblaqında yaydıqları bir mətləbə görə sistemin əleyhinə təbliğ və rəhbəri təhqir etməkdə günahlandırılıb və 3 il həbs cəzasına məhkum edilmişdir. Həmin hökm apelyasiya məhkəməsi (təcdide nəzər məhkəməsi) tərəfindən də təsdiqlənib.

Taha Kirmani 2013-cü il noyabrın 4-də (1392-ci il abanın 13-də) saxlanılıb və sorğu-suala tutulduqdan sonra Təbriz zindanına köçürülüb. O 5 aydan çox saxlanıldıqdan sonra 2014-cü il aprelin 15-də (1393-cü il fərvərdinin 26-da) mülki vəsiqə qarşılığında sərbəst buraxılıb.

Taha Kirmani ilə birlikdə və bənzər ittihamlarla yaxalanan Hüseyn Əliməhəmmədi isə hazırda Təbrizin mərkəzi zindanının 12-ci bölümündə saxlanılır. O son dəfə 2015-ci il martın 1-də (1393-cü il isfəndin 10-da) yaxalanıb və Təbriz zindanına intiqal edilib.