davam.az - BÜTÖV AZƏRBAYCAN ADINA! > Çap səhifəsi > Parlamentin səhiyyə komisyonunun üzvü: Urmu gölünün quruması xərçəng və tənəffüs sistemi xəstəliklərini artırır

Urmu gölü böhranı ilə bağlı gözlənilən iqtisadi və ekoloji problemlərin sayı-hesabı yoxdur.
Bu dəfə gölün quruması və onun ətrafında yaşayan əhalini gözləyən problemlərlə bağlı İran parlamentinin səhiyyə komisyonunun üzvü danışıb.

Abid Fəttahi “Tasnim” xəbər agentliyinin müxbiri ilə danışıqda deyib:

“Urmu gölünün 90-95 faizi artıq quruyub. Bu vəziyyət bölgənin iqlim şəraitinə öz təsirini göstərib.

Duz fırtınaları qum fırtınalarından daha təhlükəlidir. Bu günə qədər Urmu gölü ətrafında bir ciddi duz fırtınası ilə qarşı-qarşıya qalmamışıq. Buna səbəb gölün yatağında 8-10 faiz rütubətin olmasıdır. Bu rütubət bərkimiş duzların qırılmasına mane olur. Lakin sözügedən rütubət aradan gedərsə, o zaman bölgədə yaşayan insanlarda bir çox xəstəliklərə şahid olacayıq. Xərçəng (sərətan), göz, ağciyər, burun, qulaq və boğaz xəstəlikləri o cümlədəndir.”

A.Fəttahi əlavə edib ki, “Urmu gölü dünyanın ikinci duzlu gölüdür və xüsusi əhəmiyyətə malikdir. Ona görə də İranda bütün rəsmi və qeyri-rəsmi məsullar onun nicatı üçün xüsusi həssaslıq göstərməlidir.”

O sözlərinin sonunda öz həmkarlarını tənqid edərək vurğulayıb ki, “Urmu gölünün nicatı üçün bütün millət vəkilləri səy göstərməlidir, lakin çox təssüflər olsun ki, bu sadəcə Qərbi Azərbaycan millət vəkilləri ilə məhdudlaşır.”