davam.az - BÜTÖV AZƏRBAYCAN ADINA! > Çap səhifəsi > "Azercell"in səhmlərinin kim tərəfindən alınacağı hələlik bilinmir

“Əsas səhmdarın getməsi "Azercell"in fəaliyyətinə mənfi təsir göstərməyəcək”

Sentyabrın 17-də "TeliaSonera" şirkəti belə bir bəyanat yayıb ki, telekommunikasiya nəhəngi tədricən Avrasiya regionundan çıxaraq əsasən biznesini Avropa regionuna yönəldəcək. Bəyanatda deyilir ki, şirkət tədricən Avrasiya regionundan tamamilə çıxacaq. Bəyanatda qeyd edilən Avrasiya regionuna postsovet respublikaları və Nepal daxildir.

Bildiyimiz kimi, "TeliaSonera" Azərbaycanda "Azercell" brendi altında fəaliyyət göstərir. İsveç nəhənginin bu qərarı Azərbaycan ictimaiyyətində, xüsusilə KİV-lərdə aktiv şəkildə müzakirə olunmağa başladı. Müəyyən mülahizələr ortaya çıxdı. Kimi deyir ki, "Azercell" Azərbaycan bazarını tərk edir, kimi deyir ki, şirkət səhmlərini satışa çıxaracaq.

Məsələyə "APA-Economics"ə müsahibəsində "Azercell Telekom" MMC-nin prezidenti vəzifəsini icra edən Vahid Mürsəliyev aydınlıq gətirib.

- Vahid bəy, bu qərar "Azercell"in fəaliyyətinə necə təsir edəcək?

- "TeliaSonera" Avropanın telekommunikasiya nəhəngi olaraq, Şimali Avropa, Baltikyanı ölkələr və Avrasiya regionunda fəaliyyət göstərən şirkətləri əhatə edirdi. Avrasiya regionuna konkret olaraq Azərbaycan, Gürcüstan, Moldova, Qazaxıstan, Özbəkistan, Tacikistan və Nepaldakı mobil rabitə şirkətləri aiddir. Öz biznes fokusunu daha çox Avropada fəaliyyət göstərən şirkətlərə yönəltmək üçün "TeliaSonera"nın İdarə Heyəti Avrasiya regionu üzrə işgüzar fəaliyyəti dayandırmaq qərarına gəldi. Əsas səhmdarın getməsi "Azercell"in fəaliyyətinə mənfi təsir göstərməyəcək. Azərbaycanın mobil telekommunikasiya bazarının lideri "Azercell Telekom" öz fəaliyyətini eyni şəkildə davam etdirəcək. Bizim məqsədimiz hər zaman olduğu kimi, müştərilərimizə yüksək keyfiyyətli mobil rabitə xidməti göstərməkdir və bu məqsədimizə də daim sadiq qalacağıq.

- Bildiyimiz kimi, "TeliaSonera"nın "Türkcell"də 58%-dən artıq səhmi var və bu bəyanatdan dərhal sonra mobil operator bildirdi ki, səhmləri almaq niyyətindədir. Artıq söz-söhbətlər gəzir ki, "Azercell"in səhmləri satışa çıxarılacaq və s. Zəhmət olmasa, buna aydınlıq gətirin.

- "Azercell Telekom" MMC və Avrasiya regionuna aid olan digər 6 operatorun əsas səhm paketinin kim tərəfindən alınacağı barədə, hələlik, heç bir rəsmi məlumat yoxdur.

- Konsolidasiya prosesi baş tuta bilərmi?

- Bu proses haqqında da heç bir rəsmi açıqlamamız yoxdur.

- Bir az investisiya fəaliyyətiniz haqqında danışaq. Şirkətin hazırda investisiya portfelinin həcmi nə qədərdir və ilin sonuna hansı səviyyəyə çatdırılacaq?

- "Azercell" daim müştərilərinə ən yüksək xidməti təqdim etməyə və Azərbaycan cəmiyyətinin ayrılmaz hissəsi olmağa çalışmışdır. Yalnız son bir ildə biz Azərbaycanın telekommunikasiya sektoruna 57 milyon manat sərmayə yatırmışıq. Bu rəqəm "Azercell" şirkətinin fəaliyyətdə olduğu 18 il üçün 1,67 milyard manat təşkil edir. 2014-cü ildə şirkət dövlət büdcəsinə 112 mln manat, 18 il ərzində isə 1,11 milyard manat vergi ödəmişdir.

- Bilirik ki, "Azercell" Azərbaycanın ən iri vergi ödəyicilərindən biridir. Yanvar-avqust ayları ərzində şirkət nə qədər vergi ödəyib?

- Qeyd edim ki, 2015-ci ilin əvvəlindən bu günə qədər "Azercell"in dövlət büdcəsinə ödəmiş olduğu vergilər 82 milyon manatdan artıqdır.

- Şirkətin bazar payı nə qədərdir və yaxın perspektivdə hansı səviyyəyə çatdırılması nəzərdə tutulub?

- "Azercell Telekom" MMC Azərbaycanın mobil rabitə bazarının şəksiz lideridir. Hal-hazırda, şirkətin ölkənin telekommunikasiya bazarında payı 48% təşkil edir. Bizim əsas məqsədimiz müştərilərimiz üçün kəsintisiz, yüksək səviyyəli rabitə xidməti göstərməkdir. Hər zaman olduğu kimi, biz yenə də abunəçilərimizi yeni sərfəli tarif, xidmət və kampaniyalarla sevindirməkdə davam edəcəyik. Mobil rabitə bazarının lideri mövqeyini qoruyub saxlamamız da müştərilərimizin bizə olan loyallığının göstəricisidir.

- İqtisadiyyatda baş verən hadisələri gözə alaraq bir sula vermək istərdim: şirkətdə ixtisarlar aparılırmı?

- "Azercell" şirkətinin həyata keçirdiyi bütün yeniliklərin, innovasiyaların və keyfiyyətli xidmətin arxasında bizim peşəkar əməkdaşlarımız dayanır. Şirkətimiz üçün "Azercell" kollektivi böyük sərvət hesab olunur. Əməkdaşların rahat iş mühitində çalışması son dərəcə vacibdir. Hal hazırda şirkətin kadr siyasətində hər hansı ciddi dəyişikliklər nəzərdə tutulmayıb.

"Azercell"in səhmlərinin kim tərəfindən alınacağı hələlik bilinmir - MÜSAHİBƏ