davam.az - BÜTÖV AZƏRBAYCAN ADINA! > Gündəm, Diaspor > Azərbaycan ilə Bolqarıstan arasında bir çox sahələrdə əməkdaşlıq məsələləri müzakirə olunub
Azərbaycan ilə Bolqarıstan arasında bir çox sahələrdə əməkdaşlıq məsələləri müzakirə olunub |
|
Azərbaycanın Bolqarıstandakı səfiri Nərgiz Qurbanovanın bu ölkənin Veliko Tırnovo şəhərinə işgüzar səfəri zamanı bir çox sahələrdə əməkdaşlıq məsələləri müzakirə edilib.
Keçirilən görüşlərdə Naxçıvan və Veliko Tırnovo şəhərlərinin əlaqələrinin inkişafı, Bakı Dövlət Universiteti ilə Müqəddəs Kiril və Metodiy adına Veliko Tırnovo Universiteti arasında imzalanmış Anlaşma Memorandumunun həyata keçirilməsi, həmçinin Vasil Levski adına Veliko Tırnovo Milli Hərbi Universitetinin ölkəmizin müvafiq təhsil müəssisəsi ilə əməkdaşlığının qurulması imkanlarına dair fikir mübadiləsi aparılıb. Səfər çərçivəsində Azərbaycan nümayəndə heyəti Veliko Tırnovo şəhərinin meri Daniel Panov ilə görüş keçirib. Görüşdə ölkələrimiz arasında dostluq münasibətlərinin inkişafının, son vaxtlar həyata keçirilən yüksək səviyyəli səfərlərin əhəmiyyəti qeyd edilib. D.Panov Heydər Əliyev Fondunun dəstəyi ilə həyata keçirilən Veliko Tırnovo şəhərindəki “Trapezitsa” memarlıq muzeyi qoruğunun bərpa edilməsi layihəsinə görə minnətdarlığını bildirib. O, layihənin Bolqarıstan üçün böyük əhəmiyyətə malik olduğunu qeyd edib və “Trapezitsa” memarlıq muzeyi qoruğunun konservasiya və bərpası işləri barədə məlumat verib. Diplomat Heydər Əliyev Fondunun prezidenti Mehriban Əliyevanın təşəbbüsü ilə dünyanın bir çox ölkələrində qədim mədəniyyət abidələrinin bərpa edildiyini diqqətə çatdırıb. O, “Trapezitsa” qoruğunun bərpası nəticəsində bu memarlıq kompleksinin Bolqarıstan və Balkan bölgəsində ən böyük açıq səma muzeyinə çevriləcəyini deyib. Qarşılıqlı əməkdaşlığa toxunan səfir turizm, təhsil və kənd təsərrüfatı məhsullarının emalı sahələrinin münasibətlərin inkişafı üçün böyük perspektivlər vəd etdiyini bildirib. D.Panov bu sahələrdə əməkdaşlığın inkişafının önəmini vurğulayaraq qənnadı məmulatlarının istehsalında Veliko Tırnovo şəhərinin Bolqarıstanda və ümumiyyətlə bölgədə aparıcı rola malik olduğunu diqqətə çatdırıb. Səfir bu il iyulun 20-də keçiriləcək Beynəlxalq Şəki Şirniyyat Festivalı barədə məlumat verərək Veliko Tirnovo şəhərinin müvafiq şirkətlərini bu festivalda iştiraka dəvət edib. Diplomat Naxçıvan Şəhər İcra Hakimiyyətinin başçısı Vüqar Səfərovun 2014-cü ildə Veliko Tırnovo şəhərinə səfərini xatırladaraq D.Panovu Naxçıvana səfərə dəvət edib. Səfər zamanı N.Qurbanova, həmçinin Müqəddəs Kiril və Metodiy adına Veliko Tırnovo Universitetinin rektoru Xristo Bondjolov və Vasil Levski adına Veliko Tırnovo Milli Hərbi Universitetin prorektoru Veselin Madanski ilə görüşüb. Görüşdə təhsil müəssisələri arasında tələbə və akademik heyətin qarşılıqlı səfərləri, təcrübə mübadiləsi və azərbaycanlı gənclərin Avropa İttifaqının “Erasmus+” proqramı çərçivəsində müvafiq layihələrdə iştirakı imkanları müzakirə edilib. Səfərin sonunda N.Qurbanova və D.Panov bolqar mətbuatının nümayəndələri ilə görüşərək onlara iki ölkə arasında əməkdaşlığın cari vəziyyəti və perspektivləri barədə məlumat veriblər. Azərbaycan nümayəndə heyətinin Veliko Tirnovo şəhərinə işgüzar səfəri Bolqarıstan mətbuatında işıqlandırılıb. İqbal Hacıyev Geri dön |