davam.az - BÜTÖV AZƏRBAYCAN ADINA! > Çap səhifəsi > Gəncədə arı xəstəliklərinin nəzarətdə saxlanılması mövzusunda seminar keçirilib

25 may-02 iyun 2016-cı il tarixlərində Gəncə şəhərində Almaniya Beynəlxalq Əməkdaşlıq Cəmiyyətinin (GİZ) dəstəyi ilə "Arı xəstəliklərinin nəzarətdə saxlanılması" mövzusunda seminar keçirilib.

Kənd Təsərrüfati Nazirliyi yaninda Dövlət Baytarliq Nəzarəti Xidmətinin verdiyi məlumata əsasən, seminarda Türkiyənin Muğla Sıtkı Koçman Universitetinin veterinar fakültəsinin dekanı, professor Dr.Hayrettin Akkaya "Arı xəstəlikləri və ona qarşı aparılan mübarizə təbirlərinə" dair məruzə ilə çıxış edib.

Tədbirdə Kənd Təsərrüfatı Nazirliyi yanında Dövlət Baytarlıq Nəzarəti Xidmətinin, Azərbaycan Dövlət Aqrar Universitetinin, Naxçıvan Dövlət Universitetinin, AMEA Zoologiya İnstitutunun əməkdaşları, baytarlıq mütəxəssisləri, eləcə də arıçılıqla məşğul olan rayonların arıçıları iştirak ediblər.

Seminar Kənd Təsərrüfatı Nazirliyi yanında Dövlət Baytarlıq Nəzarəti Xidməti, Humanitar Yardım üzrə Respublika Komissiyası, Gəncə Şəhəri İcra Hakimiyyəti, Azərbaycan Arıçılar İttifaqı və Azərbaycan Dövlət Aqrar Universitetinin (ADAU) dəstəyi ilə baş tutub.

Keçirilən seminar zamanı 35-ə qədər iştirakçı Göygöl, Samux və Goranboy rayonlarında olan müxtəlif arıxanalarda olub, Respublika Baytarlıq Laboratoriyası işçilərinin nəzarəti altında nümunələr götürüb və ADAU-nun laboratoriyasında müxtəlif xəstəliklərə görə müayinədən keçiriblər.

Seminarda varroa gənəsi, novimatoz, akarapidoz, Avropa çürüməsi, Amerika çürüməsi, pullu çürümə, nosema cerenae, nosema apis kimi parazit və infeksion xəstəliklərin diaqnostikası, klinikası, arılardan nümunələrin təlimata uyğun götürülməsi, arıların erkən yaz və payız qidalandırılması, xəstəliklərə qarşı aparılan mübarizə üsulları, profilaktik tədbirlər barədə məlumatlar verilmiş və ətraflı fikir mübadiləsi aparılıb.

8 gün müddətində davam edən seminarda professor Dr.Hayrettin Akkaya tərəfindən Türkiyə və dünyadakı arıxanalarda mövcud olan infeksion və invazion xəstəliklər və onlarla mübarizə üsulları zamanı qazanılmış təcrübələr, istifadə olunan arı dərmanları barədə də məlumatlar verilib.

Seminar çərçivəsində arı xəstəliklərinin aşkar olunması və qarşısının alınması istiqamətində baytarlıq mütəxəssisləri xeyli bilik və təcrübə əldə ediblər. Arıçılara bildirilib ki, artıq Azərbaycanda arı xəstəliklərinə baytarlıq laboratoriyalarında diaqnoz qoyulur və xəstəliklərə qarşı mütəşəkkil mübarizə işi təşkil edilir.

Seminar öz işin iyun ayının 3-də Azərbaycan Dövlət Aqrar Universitetində, 4-də isə Dövlət Baytarlıq Nəzarəti Xidmətində keçiriləcək konfranslarda davam etdirəcək.