davam.az - BÜTÖV AZƏRBAYCAN ADINA! > Çap səhifəsi > Azərbaycanlı gənc rəssamlar Bolqarıstanda müsabiqədə mükafatlara layiq görülüblər

2012-ci ildə Bolqarıstanda təsis olunan “Little Zograff” Fondu tətbiqi və təsviri incəsənətlə bağlı kurslar, forumlar, konfranslar təşkil edir, uşaqlar üçün beynəlxalq səviyyədə müsabiqələr keçirir. Fondun məqsədi təsviri və tətbiqi incəsənət vasitəsilə uşaqların mənəvi, intellektual və professional inkişafına yardım göstərməkdir. Bu məqsədlə Fond dövlət və QHT-lərlə fəal əməkdaşlıq edir.

Fond tərəfindən 2015-ci il Bolqarıstanın Bansko şəhərində təşkil olunan beynəlxalq müsabiqədə 50-dən çox ölkədən 7000 rəsm təmsil olunmuşdur. Müsabiqədə Azərbaycan, Hindistan, Çin, Yaponiya, Tayland, Mərakeş, İtaliya, İspaniya, Türkiyə, Polşa, Rusiya və digər ölkələrdən olan 4-18 yaşarası uşaqlar iştirak etmişlər. Emiliya Həbibulia (8 yaş) və Nuray Fərəcova (5 yaş) müsabiqədə ölkəmizi layiqincə təmsil edərək müvafiq olaraq Qızıl medal və Fəxri mükafata layiq görülüblər.

Bununla yanaşı, Nova Zaqora Assosiasiyası və “Dugo” Art studio tərəfindən hər il Bolqarıstanın Nova Zaqora şəhərində Beynəlxalq Gənclər İncəsənət Sərgisi təşkil olunur. Sərgidə müxtəlif ölkələrdən 4-20 yaşarası gənc rəssamların əl işləri nümayiş olunur. Sərgiyə təqdim olunan işlər məşhur rəssamlardan ibarət jüri tərəfindən qiymətləndirilir və ən yaxşı əsərlər mükafata layiq görülür. Sərgi iştirakçılarının adlarının və təmsil etdikləri məktəblərin əks olunduğu kataloq dərc olunur.

1 iyun 2016-cı il tarixində Nova Zaqora şəhərində nümayiş olunan sərgidə “Artline Azərbaycan Group Masterkids” klubunu təmsil edən gənc rəssamlar Nəzifə Bayramova və Rəna Nəsirova və YARAT Müasir İncəsənət Məkanını təmsil edən Süleyman Abdullayev və Əlixan Muradov diplomlarla təltif olunublar.