davam.az - BÜTÖV AZƏRBAYCAN ADINA! > Çap səhifəsi > GÖRKƏMLİ ALİM XUDU MƏMMƏDOVUN ŞƏXSİ KİTAB KOLLEKSİYASININ TƏQDİMATI KEÇİRİLDİ

AMEA-nın Mərkəzi Elmi Kitabxanasında görkəmli elm və ictimai-siyasi xadim, professor, AMEA-nın müxbir üzvü, geologiya-minerologiya elmləri doktoru, 1969-cu ildə yaradılmış Milli Azadlıq Qərargahı təşkilatının qurucularından biri, Böyük Britaniya Kral Akademiyasının fəxri üzvü Xudu Məmmədovun şəxsi kitab kolleksiyasının təqdimatı keçirildi.

Tədbiri giriş sözü ilə açan MEK-in Beynəlxalq və İctimaiyyətlə Əlaqələr şöbəsinin müdiri Mübariz Göyüşlü hər həftənin dördüncü günü kitabxanada kitab kolleksiyalarının təqdimatlarının keçirildiyini bildirərək onlardan bir neçəsini sadaladı.

Təqdimatçı, Kitabxana-Xidmət şöbəsinin İstifadəçilərə xidmət bölməsinin əməkdaşı Alidə Həsənova X. Məmmədovun həyat və yaradıcılığı haqqında geniş məlumat verdi: “Kolleksiya 666 kitabdan ibarətdir. Burada istər kimya elmi, istər ədəbiyyat, istər naxışlara aid olan, demək olar ki, bütün elm sahələrinə aid kitablar tapmaq olar. Kolleksiya kitabxanaya 2008-ci ildə X.Məmmədovun ailəsi tərəfindən təqdim olunub. Kolleksiyanı 21 ədədi azərbaycan dilində, 36 ədəd xarici dillərdə, əksəriyyətini rus dilində olan kitablar təşkil edir. Qeyd edək ki, bu kitablar Xudu Məmmədovun kitabxanasında onun öz şəxsi möhürü ilə qorunub saxlanır”.

BDU-nin Jurnalistika fakültəsinin dekanı, professsor Cahangir Məmmədli çıxışında qeyri-adi şəxsiyyət olan Xudu Məmmədovun alimliyinin, elmi fəaliyyətinin şəxsiyyətini təbii şəkildə tamamladığını, yaxın tariximizdə xalqımızın yetişdirdiyi unikal şəxsiyyətlərdən biri olduğunu vurğuladı.

AMEA-nın Kataliz və Qeyri-üzvi Kimya İnstitutunun böyük elmi işçisi, kimya üzrə fəlsəfə doktoru Vaqif Qasımov yenilikçi alimin zəngin elm və ədəbiyyat dünyasının işığına toplaşıldığını, gələn il AMEA-da X.Məmmədovun 90 illik yubileyinin keçiriləcəyini qeyd etdi.

Milli Məclisin deputatı, yazıçı Aqil Abbas Xudu Məmmədovun böyük alim olmaqla bərabər xalqımızın yaxın ictimai-siyasi tarixdə öz yeri olan, türkçülük ideyalarının yaşaması və təbliği yolunda çalışan, sovet rejiminin hökm sürdüyü dövrdə Azərbaycanın müstəqilliyi uğrunda mübarizə aparan azsaylı ziyalılarımızdan biri olduğunu dedi.

X. Məmmədovun müasirləri olan ziyalılar Səlim Əzimov, Yusif Səmədov, Şahlar Baba, Ramiz Əliyev və “Lütfi-Zadə irsi və süni intellekt assosiasiyasının” təmsilçisi Şamil Mehdi onunla bağlı uşaqlıq və gənclik xatirələrini paylaşdılar, xarakterinə, səmimiyyətinə, insanpərvərliyinə, əxlaqına, elminə görə nadir şəxsiyyətlərdən biri olduğunu söylədilər.

Mərkəzi Elmi Kitabxananın Kitabxana-Xidmət şöbəsinin müdiri Aygün Səfərova MEK-də keçirilən kolleksiya təqdimatlarından söz açdı. O, bildirdi ki, kolleksiyaların və kitabxanaya daxil olan kitabların elektron katoloqa salınması istiqamətində işlər davam etdirilir.

Sonda Xudu Məmmədovun kitab kolleksiyasının kiçik bir hissəsindən təşkil edilmiş olan sərgiyə baxış keçirildi və xatirə şəkli çəkildi.

AMEA Mərkəzi Elmi Kitabxana

Beynəlxalq və İctimaiyyətlə Əlaqələr şöbəsi

Əlaqə:
(012) 539-73-67 (daxili 12-12)
info@mek.az