davam.az - BÜTÖV AZƏRBAYCAN ADINA! > Çap səhifəsi > MEK əməkdaşları Belarusa ezam olunublar

AMEA Mərkəzi Elmi Kitabxanasının (MEK) əməkdaşları - Ümumi işlər üzrə direktor müavini Fuad Aslanov, Kitabxana-Xidmət şöbəsinin müdiri Aygün Səfərova, Rəqəmsallaşdırma bölməsinin rəhbəri Elmar Quliyev və Milli Rəqəmsal Yaddaş şöbəsinin baş mütəxəssisi Günel Əhədova 6-13 noyabr tarixlərində Belarusiya Milli Kitabxanasına ezam olunmuşlar. Səfərin əsas məqsədi müasir kitabxana-informasiya sahəsində təcrübə qazanmaq, rəqəmsallaşdırma, rəqəmsal mühafizə, kitabxanada mühafizə olunan sənədlərin fiziki, texniki bərpası və digər sahələrdə müasir kitabxana təcrübəsini öyrənmək, kitabxana-xidmət sahələrinin təhlükəsizlik sistemini mənimsəməkdir.
MEK əməkdaşlarına Belarus Milli Kitabxanasının (BMK) Elmi işlər üzrə direktor müavini Lyudmila Kiruxina təmsil etdiyi qurumun gördüyü işləri haqqında məlumat vermiş, kitabxanaya ekskursiya təşkil etmişdir. Görüşün sonunda belarus həmkarlara MEK adından Azərbaycanın tarixi və mədəniyyətinə dair kitablar hədiyyə edilmişdir.
Səfər zamanı BMK-ın İnformasiya Mərkəzinin müdiri Alla Şeremetova, Biblioqrafik-İnformasiya Texnologiyaları şöbəsinin müdiri Janna Risieva və kitabxananın aparıcı mütəxəssisləri azərbaycanlı həmkarlarını şöbə və bölmələrin iş fəaliyyəti ilə yaxından tanış etmişlər.
Restavrasiya və bərpa mərkəzində Mərkəzi Elmi Kitabxananın əməkdaşları iş prosesi və sənədlərin restavrasiya texnikasının müxtəlif üsulları ilə yaxından tanış olmuşlar. Həmçinin kitabxanada istifadə olunan ABİS proqramı, rəqəmsallaşdırmanın texniki təchizatının əsas şərtləri, müasir üsulları, standartlara əsaslanmış Belarus təcrübəsi ilə tanışlıq olmuşdur. MEK əməkdaşları kitabxanada yerləşən və əlyazmalardan ibarət olan kitab muzeyi ilə də tanış olmuşlar.
Təcrübə mübadiləsi səfəri davam edir.