davam.az - BÜTÖV AZƏRBAYCAN ADINA! > Çap səhifəsi > BDU-da məşhur türk yazıçının anım günü qeyd olunub

Bakı Dövlət Universiteti, Yunus Əmrə İnstitutu və Azərbaycan Yazıçılar Birliyinin birgə təşkilatçılığı ilə Türkiyənin məşhur yazıçısı Əhməd Həmdi Tanpınarın anım gününə həsr olunmuş tədbir keçirilib.

Universitetin mətbuat və informasiya şöbəsindən verilən məlumata görə, tədbir “Dünyam – Əhməd Hamdi Tanpınarın həyatından səhnələr” adlı sərginin açılışı ilə başlayıb.

Bakı Dövlət Universitetinin rektoru, akademik Abel Məhərrəmov türk yazıçı, şairi Əhməd Həmdi Tanpınarın ədəbiyyatdakı rolundan, 63 illik həyatını bu sahəyə həsr etməsindən bəhs edib. Rektor Azərbaycan oxucusunun onu yaxından tanıması məqsədilə Yunus Əmrə İnstitutu tərəfindən keçirilmiş “Tanpınarı kəşf edirəm” adlı esse müsabiqəsinin önəmindən bəhs edib, qalibləri təbrik edib.

Azərbaycan Yazıçılar Birliyinin sədri, xalq yazıçısı Anar Əhməd Həmdi Tanpınarın yaradıcılığından danışıb, əsərlərinin bir çox dillərə tərcümə edildiyini qeyd edib. Türkiyənin Azərbaycandakı səfirliyinin əməkdaşı Məkbulə Koçak, millət vəkili Jalə Əliyeva və Azərbaycan Yazıçılar Birliyinin üzvü Çingiz Abdullayevin çıxışlarından sonra Əhməd Həmdi Tanpınarın şeirləri səsləndirilib. Sonda Yunus Əmrə İnstitutunun müdiri İbrahim Yıldırım “Tanpınarı kəşf edirəm” adlı müsabiqəyə təqdim olunmuş esselərin Türkiyənin və Azərbaycanın tanınmış yazıçıları tərəfindən dəyərləndirildiyini bildirib.

Nəticələr elan edildikdən sonra qaliblərə sertifikatlar təqdim edilib.