davam.az - BÜTÖV AZƏRBAYCAN ADINA! > Gündəm, Müsahibə > “GƏLƏN İL BİZ ƏSASLI KADR İSLAHATLARININ ŞAHİDİ OLACAĞIQ”
“GƏLƏN İL BİZ ƏSASLI KADR İSLAHATLARININ ŞAHİDİ OLACAĞIQ” |
|
Elşən Manafov: “Prezidentin təklif etdiyi iqtisadi yolxəritəsi mükəmməl hazırlanıb. Orada göstərilən müddəalar yerinə yetirilərsə, böhranın qarşısı alınacaq”
“Məncə yenidan Qarabağ məsələsini BMT-yə daşımaq mümkündür” Neftin qiymətinin kəskin düşməsi, neft ixrac edən ölkələrin iqtisadiyyatına təsirsiz ötüşmədi. Qiymətlərin düşməsi Azərbaycana da mənfi fəsadlar yaratdı. Milli valyutanın devalvasiyaya uğraması vətəndaşların həyat şəraitinin pisləşməsinə səbəb oldu. Təbii ki, Azərbaycan hökuməti fəsadların aradan qaldırılması üçün bir sıra addımlar atmağa, islahatlar həyata keçirməyə başlayıb. Artıq post-neft dövrünün tələblərinə uyğun olaraq iqtisadiyyatın inkişafı üçün yol xəritəsi hazırlanıb ki, bunun tətbiqinin böhranı aradan qaldıracağı gözlənilir. Milli Dirçəliş Hərəkatı Partiyasının sədr müavini Elşən Manafovla söhbətimizdə iqtisadi konsepsiyaların faydaları haqqında danışdıq. Bununla yanaşı, partiya funksioneri ilə ölkədəki siyasi duruma, təşkilatların fəaliyyətinə, eyni zamanda Dağlıq Qarabağ münaqişəsinin həlli ilə bağlı aparılan danışıqlara qiymət verməyə çalışdıq. E.Manafov hesab edir ki, aztəminatlı vətəndaşların maddi durumu pisləşib ki, bu danılmaz faktdır... - Manatın devalvasiyasının qlobal iqtisadi böhranla əlaqədar olması sirr deyil. Neftin qiymətinin kəskin düşməsi Azərbaycan kimi neftdən gəlir əldə edən ölkələrin büdcəsinə mənfi təsir göstərir. Hökumət islahatlara başlayıb. Amma bu qısa zamanda müsbət nəticə verməyəcək. Vəziyyətdən çıxmaq üçün Prezidentin təklif etdiyi iqtisadi yol xəritəsi mükəmməl hazırlanıb. Orada göstərilən müddəalar yerinə yetirilərsə, böhranın qarşısı alınacaq. Müəyyən qüvvələr var ki, planların həyata keçirilməsində, islahatların aparılmasında maraqlı görünmürlər. Həmin qüvvələr səmimi olsalar, böhranlı iqtisadi durumdan çıxmaq mümkündür. Əks halda, vəziyyət daha da ağırlaşa bilər. Onu da deyim ki, müəyyən kadr dəyişikliklərinin həyata keçirilməsi də zəruridir. Mənə elə gəlir ki, gələn ildə biz əsaslı kadr islahatlarının da şahidi olacağıq. - Siyasi cameənin fəaliyyətini necə qiymətləndirirsiz? - Siyasi sferada durum ürəkaçan deyil. Müxalif qüvvələr çox zəifdirlər. Hesab edirəm ki, iqtidar müxalifətlə münasibətləri yüksəltməlidir. Hakim partiya funksionerləri bəlkə də müxalifətin zəif olmasında maraqlıdır və bunu sevindirici hal kimi qiymətləndirirlər. Əslində isə, müxalifət güclü olarsa, o zaman bundan xalq karlı çıxar. Müxalif təşkilatların konsepsiyalarından, proqramlarından yararlanmaqda hökumətə fayda ola bilər. Düşünürəm ki, iqtidarla müxalifətin münasibətlərinin normal olmasına, əlaqələrin gücləndirilməsinə ehtiyac var. Çünki Azərbaycanın bütün qüvvələri ümummilli məsələlərdə eyni fikirdədir. - 20 ildən artıqdır Qarabağ münaqişəsi ilə bağlı danışıqlar aparılsa da, müsbət nəticə əldə olunmayıb. Qarabağ düyününün açılmasını nədə görürsüz? - Çox təəssüflər olsun ki, Qarabağ münaqişəsinin sülhlə həllinə yardımçı olduğunu deyən ATƏT-in Minsk Qrupu üzərinə düşən vəzifənin öhdəsindən gələ bilmir. Bunun da bir sıra səbəbləri var. Etiraf edək ki, ATƏT özü bir təşkilat olaraq tövsiyyə xarakterli qərarlar qəbul edən bir qurumdur. Bu təşkilatın tərkibində olan Minsk Qrupu problemi hansı yolla həll edə bilər ki? Eyni zamanda həmsədr dövlətlərə də baxmaq lazımdır. Üç həmsədrin fikirləri, geosiyasi maraqları üst-üstə düşmür. Bu dövlətlərdə bir xristian təəssübkeşliyi də mövcuddur. Azərbaycan nə qədər dini tolerantlıq nümayiş etdirsə də, xristian birliyi öz sözünü deyir. - Yəni hesab edirsiz ki, dini faktor əsaslı rol oynayır? - Siz dini məsələyə barmaqarası yanaşmayın. Hər halda xristian təəssübkeşliyi önəmli rol oynamasaydı, o zaman Ermənistanın prezidenti Sarkisyan bütün böynəlxalq hüquq normalarına sayğısızlıq edərək, işğalçılığı davam etdirməzdi. Dini amilin rolu var ki, Ermənistanın şıltaqlıqlarına səbr nümayiş etdirilir. Sarkisyanın işğal etdikləri Azərbaycanın Qarabağ bölgəsinə gəlib, hərbi təlimlərə komandanlıq etməsi, artıq bütün hüquqi normaları tapdalamaqdır. Sarkisyanın bu hərəkəti hesab edirəm ki, Azərbaycanı müharibəyə cəlb etmək niyyətindən qaynaqlanır. Təbii ki, rəsmi Bakı sülh danışıqlarına sadiqlik nümayiş etdirib, səbr göstərir. Amma Azərbaycanın səbrinin də həddi var. - Səbrin tükənməsi, müharibə ilə çözüm məsələsini ortaya qoyur. Çıxış yolu müharibədirmi? - Müharibəyə düşünülmüş şəkildə başlamaq lazımdır. Azərbaycan nə qədər bildirsə də ki, Ermənistana qarşı müharibə yox, öz işğal edilmiş ərazilərimizdəki terrorçuları təmizləmək üçün, hərbi gücdən istifadə edirik, Rusiya və Kollektiv Təhlükəsizlik Müqaviləsi Təşkilatının üzvləri bunu Ermənistana qarşı müharibə kimi anlayacaqlar. Bu ilin aprel döyüşlərini biz gördük. Düzdü, KTMT üzvləri müəyyən qədər loyal münasibət göstərdilər. Amma əsas güclərdən olan Rusiya atəşkəs üçün əlindən gələni etdi. Bütün hallarda Azərbaycan müharibə addımını atmaq məcburiyyətində qalacaq. Çünki 25 ildən çoxdur torpaqlar işğaldadır, Ermənistan işğalçılıq siyasətini davam etdirir, sülh danışıqları isə heç bir nəticə vermir. Belə olan halda yalnız müharibə variantı gündəmə gəlir. Amma müharibə qərarından öncə yenidən məsələ BMT-nin Təhlükəsizlik Şurasına çıxarılmalıdır. Təəssüflə qeyd etmək lazımdır ki, Azərbaycan Təhlükəsizlik Şurasında üzv olduğu bir il ərzində imkanlardan səmərəli şəkildə istifadə edə bilmədi. Halbuki, o zaman münaqişəni Təhlükəsizlik Şurasının gündəminə gətirib, məlum Qarabağ qətnamələrinin icrasına nail ola bilərdi. Yenə də gec deyil. Məncə yenidan Qarabağ məsələsini BMT-yə daşımaq mümkündür. Sadəcə çalışmaq lazımdır. Bununla hansısa nəticə əldə olunmasa, o zaman müharibə qaçılmazdır. Azərbaycanın hərbi yolla öz ərazilərini işğalçı separatçılardan azad etmək üçün, kifayət qədər gücü var. Hərbi əməliyyatlara başlanılsa, qısa müddətdə uğur əldə edilsə, o zaman beynəlxalq güclər Azərbaycanla hesablaşmağa məcbur olacaqlar. Rəsmi Bakı ilə danışıq aparmağa cəhd göstərəcəklər, Azərbaycanın şərtlərini dinləyəcəklər. Bu zaman dolayısıyla Ermənistana təzyiq edəcəklər. Anar Bayramoğlu Geri dön |