davam.az - BÜTÖV AZƏRBAYCAN ADINA! > Gündəm, İqtisadiyyat > İndiyədək dünya bazarında Azərbaycanın payına düşən 232 mln. ton mənfəət nefti satılıb
İndiyədək dünya bazarında Azərbaycanın payına düşən 232 mln. ton mənfəət nefti satılıb |
|
Xəzər dənizinin Azərbaycan sektorunda yerləşən “Azəri”, “Çıraq” yataqları və “Günəşli” yatağının dərinsulu hissəsindən ("AÇG" layihəsi, "Əsrin Müqaviləsi") işlənmənin əvvəlindən 2017-ci il yanvarın 1-dək 416,5 mln. ton neft və 128,2 mlrd. kubmetr qaz hasil edilib.
Bunu Azərbaycan Dövlət Neft Şirkətinin (SOCAR) I vitse-prezidenti Xoşbəxt Yusifzadə “Respublika” qəzetinə müsahibəsində bildirib. Onun sözlərinə görə, hazırda həmin yataqlardan ayda 2,6 mln. ton neft və 1 mlrd. kubmetrdən çox qaz hasil olunur: “Artıq 18 ildir ki, “Azəri-Çıraq-Günəşli” layihəsinin iştirakçıları mənfəət neftindən gəlir əldə edir. 2017-ci il yanvarın 1-dək dünya bazarında Azərbaycanın payına düşən 231,8 mln. ton mənfəət nefti satılıb. Mənfəət neftinin həcmi ilbəil artır. 2016-cı ildə dünya bazarında satılmış 32,7 mln. ton neftin 19,3 mln. tonu, yəni 59%-i Azərbaycanın payına düşən mənfəət nefti olub”. Şirkət rəsmisi qeyd edib ki, bu il yanvarın 1-dək dünya bazarına 435,4 mln. ton Azərbaycan nefti çıxarılıb və bunun 321,7 mln. tonu Bakı-Tbilisi-Ceyhan boru kəməri ilə nəql edilib. Xatırladaq ki, "AÇG" yataqlar blokunun birgə işlənməsi və hasil olunan neftin pay şəklində bölüşdürülməsi haqqında (PSA) saziş 1994-cü il sentyabrın 20-də imzalanıb. "AÇG" layihəsində BP (operator – 35,8%), SOCAR (11,6%), "Chevron" (11,3%), "İnpex" (11%), "Statoil" (8,6%), "ExxonMobil" (8%), TPAO (6,8%), "İtochu" (4,3%), "ONGC Videsh Ltd." (OVL, 2,7%) şirkətləri iştirak edir. Geri dön |