davam.az - BÜTÖV AZƏRBAYCAN ADINA! > Çap səhifəsi > İsrayilin xarici işlər naziri Bakıda görüşlər keçirib

İSRAİLİN XARİCİ İŞLƏR NAZİRİ BAKIDA GÖRÜŞLƏR KEÇİRİB

Azərbaycan prezidenti İlham Əliyev aprelin 23-də İsrailin baş nazirinin müavini, xarici işlər naziri Aviqdor Libermanın başçılıq etdiyi nümayəndə heyətini qəbul edib.
Görüşdə Azərbaycanla İsrail arasında əlaqələrin müxtəlif sahələrdə inkişafına dair məsələlər ətrafında fikir mübadiləsi aparılıb.

Həmin gün Aviqdor Liberman Azərbaycanın xarici işlər naziri Elmar Məmmədyarovla da görüşüb. Görüşdə ölkələr arasında əlaqələrin müxtəlif sahələrdə inkişaf etdiyi vurğulanıb. Liberman əlaqələri daha da genişləndirməyin vacibliyini qeyd edib.

Azərbaycanla İsrail arasında müqavilə-hüquq bazasının genişləndirilməsinin əhəmiyyəti də vurğulandığı görüşdə israilli nazir Azərbaycanın BMT Təhlükəsizlik Şurasına üzv seçilməsindən məmnun olduğunu, beynəlxalq təşkilatlar çərçivəsində əməkdaşlığın daha da dərinləşdirilməsinin vacibliyini qeyd edib.

Elmar Məmmədyarov israilli həmkarına Dağlıq Qarabağ münaqişəsinin sülh yolu ilə həlli prosesi istiqamətində atılan addımlar barədə məlumat verib.

Aprelin 23-də Aviqdor Liberman “Xabad-Or-Avner” təhsil mərkəzində Azərbaycandakı yəhudi dini icmalarının rəhbərləri ilə görüş keçirib.

O bildirib ki, Azərbaycanda bütün dini icmaların sərbəst şəkildə fəaliyyət göstərdiyi bu mühiti alqışlamaq lazımdır: “Biz Azərbaycanla münasibətlərimizdən razıyıq. Bu, təkcə mövcud əlaqələrdən deyil, həm də tarixi bağlılıqdan qaynaqlanır. Qubanın Qırmızı qəsəbəsində yəhudilərin yaşaması Azərbaycanın antisemitizmin heç vaxt olmadığı ölkə kimi xarakterizə etməyə imkan verir”.