davam.az - BÜTÖV AZƏRBAYCAN ADINA! > Diaspor > ABŞ-da 31 mart soyqırımına dair qətnamə qəbul edilib
ABŞ-da 31 mart soyqırımına dair qətnamə qəbul edilib |
|
Amerika-Azərbaycan Cəmiyyətinin (ASA) və Amerika Azərbaycanlıları Şurasının (AAC) üzvlərinin səyləri nəticəsində ABŞ-ın Nyu-York ştatının Senatında martın 31-ni soyqırımına məruz qalmış azərbaycanlıları anma günü elan edən qətnamə qəbul edilib.
Nyu-York ştatının Roçester şəhərinin 55-ci dairəsinin senatoru Ceyms Alesi tərəfindən təqdim olunan qətnamədə “Daşnaksütyun” partiyasının və Stepan Şaumyanın rəhbərliyi altında bolşeviklərin 1918-ci ildə Azərbaycan xalqına qarşı törətdikləri cinayətlər geniş əksini tapıb. Qətnamənin mətnində 1918-ci il martın 31-də baş vermiş hadisələrin azərbaycanlıların soyqırımı olduğu dəfələrlə vurğulanır. Qətnaməni qəbul edən senatorlar Nyu-York şəhərinin qubernatoru Endryu Kuomoya 31 mart tarixinin azərbaycanlıların soyqırımının anma günü kimi qeyd olunması ilə əlaqədar müvafiq tövsiyələr verib Sənəddə bildirilir ki, 94 il əvvəl bolşevik-daşnakların azərbaycanlılara qarşı törətdikləri qırğın nəticəsində yaşlılar, qadınlar, uşaqlar da daxil olmaqla on minlərlə günahsız insan həlak olmuşdur. S.Şaumyanın rəhbərliyi altında bolşevik-daşnak dəstələri insanları qətlə yetirməklə kifayətlənməmiş, müsəlmanlara məxsus ibadət yerlərini yandırmış, insanların mülkiyyətinə xeyli ziyan vurublar. Möhtəşəm tarixi “İsmailiyyə” binası bolşevik-daşnak dəstələri tərəfindən yandırılmış, Təzəpir məscidinin minarələri top atəşi ilə zədələnibdir. Sənəddə deyilir ki, 1918-ci ilin martında azərbaycanlılara qarşı soyqırımı aktı təkcə Bakı ilə məhdudlaşmayıb. Erməni daşnakları Azərbaycanın Şamaxı, Quba, Lənkəran, Muğan bölgələrində də qadınlar, uşaqlar daxil olmaqla minlərlə günahsız insanı qətlə yetirmiş, yüzlərlə kəndi yandırmışlar. Təkcə Qubanın 162 kəndi yandırılmış, burada 16 mindən artıq azərbaycanlı öldürülübdür. Bu hadisələrlə bağlı Azərbaycan Demokratik Respublikası tərəfindən Xüsusi Araşdırma Komissiyası yaradılmış və toplanmış çoxsaylı sənədlər hökumətə təqdim edilibdir. Geri dön |