davam.az - BÜTÖV AZƏRBAYCAN ADINA! > DAVAMın yazıları > Yolruh ATALI - İstək və İnam
Yolruh ATALI - İstək və İnam |
|
Yolruh ATALI
İstək və İnam (İçsəs) İnsan yaşamındakı bütün davranışların, hərəkətlərin, olayların özülündə İnam dayanır. *** İnanmasan – getməzsən. Gedəcəyinə inanırsan – gedirsən. *** İnanmasan – danışmazsan. Danışacağına inanırsan – danışırsan. *** İnanmasan – gülməzsən. Güləcəyinə inanırsan – gülürsən. *** Hər davranış, hərəkət, olay özüylə ilgili bir istəyə, duyğuya bağlıdır. Davranışın, olayın adı həm də özüylə bağlı istəyin, duyğunun adıdır. *** “Getmək” həm hərəkətin, olayın adıdır, həm də “getmək” adlı istəyin, duyğunun. *** “Danışmaq” həm hərəkətin, olayın adıdır, həm də “danışmaq” adlı istəyin, duyğunun. *** “Gülmək” həm hərəkətin, olayın adıdır, həm də “gülmək” adlı istəyin, duyğunun. *** İstək – İnamın davranış və olaylar biçimində gerçəkləşməyə can atmasıdır. *** İradə – İnamın davranış və olay biçimində gerçəkləşməsi, doğrulmasıdır. *** İnam – birdir, istəklər – milyonlarla. Milyonlarla istək, bir İnamdan yaranır, ondan asılı olur. *** İnam – insandakı əzəli, əbədi, sonsuz, kamil, mütləq imkandır. İnsan bütün yaşamı boyu içindəki həmin İnam imkanını gerçəkləşdirir. *** Elə bir istək yoxdur ki, insan onu gerçəkləşdirəcəyinə inanmasın. İnsan – İnamlı varlıqdır. *** İnsanın bütün yaşamı – istək və duyğuların yerinə yetirilməsi, gerçəkləşməsidir. *** İnsan inandığını istəyir, iradə istəyi gerçəkləşdirir. *** İnsanda inanmadığı nəyisə istəmək – yoxdur. *** İnsan inanmağa borcludur, məcburdur. İnsan inanmasa – yaşaya bilməz. *** Dünyaya inanmadan dünyada yaşamaq olmaz. Həyata inanmadan həyatda yaşamaq olmaz. İnsana inanmadan toplumda yaşamaq olmaz. *** Dünyada inanılmayan hər hansı nəsnə yoxdur. Dünyada inamı doğrultmayan çox şey var. *** İradənin təməli – İnamdır. İnsan öz inamını, istəyini gerçəkləşdirmək iradəsinə inanır. *** İnsan həyatda İnam cazibəsində, çəkimində yaşayır. *** İnsan İnam cazibəsindən, çəkimindən qırağa çıxa bilmir. Çıxsa – ölər. *** Aristotel hərəkətin səbəbini – cazibədə axtarırdı. İnam Ata hərəkətin səbəbini – Mütləqdə axtarır. *** Cazibə – Mütləqin ifadəsidir. Mütləq – Cazibənin qaynağı, özülüdür. Mütləq olmasa, cazibə haradan olar? *** İnamın təməli – Mütləqdir. Mütləq – əzəli, əbədi, sonsuz, kamil, tükənməzdir. *** İnsanın Mütləqə – əzəliyə, əbədiyə, sonsuza, kamilə, tükənməzə inanmaq istəyi var. *** İstəksizlik – İnamsızlıqdır, Mütləqsizlikdir. *** Kamilliyə inamın yoxdursa – kamil olmaq istəyin də yoxdur. *** İnsanlığa inamın yoxdursa – insan olmaq istəyin də yoxdur. *** Əxlaqa inamın yoxdursa – əxlaqlı olmaq istəyin də yoxdur. *** Ədalətə inamın yoxdursa – ədalətli olmaq istəyin də yoxdur. *** Mütləqə inamın yoxdursa – mütləq olmaq istəyin də yoxdur. *** İnsan əslində istədiyinə görə yox, inandığına görə davranır, hərəkət edir, yaşayır. *** İnsan inamlı olanda – mümkün olmayanı da eləmək istəyir. *** İnsan inamsız olanda – mümkün olanı da eləyə bilmir. *** Yalnız Mütləq olana inam – İnamdır – ruhani fərəhdir. Mütləq olmayana inam – aldanışdır, ağrı-acıdır, əzabdır. *** İstəkdə İnsan – İnamını gerçəkləşdirməyə can atır. *** İnamda İnsan – Mütləqə can atır. *** İnam – Mütləqin özü və adıdır. *** Atamız var olsun! 26 Şölə 34-cü il. (26.6.2012). Geri dön |