davam.az - BÜTÖV AZƏRBAYCAN ADINA! > Çap səhifəsi > Azərbaycan Kaliforniya festivalında iştirak edib

Avqustun 25-26-da Kaliforniyanın Monterey şəhərində keçirilən tanınmış Türk Mədəniyyət və İncəsənət Festivalında Azərbaycan da təmsil olunub.
Azərbaycanın Los Ancelesdəki Baş Konsulluğundan verilən məlumata görə, dəstəyi ilə quraşdırılmış Azərbaycan stendində ölkəmizə dair müxtəlif məlumat kitabçaları, turist xəritələri, suvenirlər və kiçik xalçalar sərgilənib.
Festival iştirakçıları tərəfindən ən çox ziyarət olunan stenddə, həmçinin, Azərbaycan nar şirəsi qonaqlara təqdim olunub. Artıq bir müddətdən bəri Kaliforniyanın yüzlərlə dükanında uğurla satışı həyata keçirilən, birbaşa Azərbaycandan idxal edilən nar şirəsi festival iştirakçıları tərəfindən çox bəyənilib.
Festivalda çıxış edən mahir kamança ustası İmamyar Həsənov ifa etdiyi Azərbaycan musiqisi nümunələri ilə tamaşaçıları riqqətə gətirib.
Daha sonra vaxtilə üç il Azərbaycanda yaşamış, hazırda Monterey şəhərində təhsil alan amerikalı tələbə Mayka Land çıxış edərək, Azərbaycanın nailiyyətləri, zəngin tarixi və mədəniyyəti, azərbaycanlıların yüksək qonaqpərvərlik və dözümlülük ənənələri barədə öz təəssüratlarını paylaşıb.
Xatırladaq ki, Monterey şəhəri 2011-ci ildən etibarən Lənkəran şəhəri ilə qardaşlaşmış şəhərdir.