davam.az - BÜTÖV AZƏRBAYCAN ADINA! > Hadisə > Abşeronda ölümlə nəticələnən yol-nəqliyyat hadisəsi törədib qaçan sürücü tutulub
Abşeronda ölümlə nəticələnən yol-nəqliyyat hadisəsi törədib qaçan sürücü tutulub |
|
Abşeron rayonu ərazisində qeyri-aşkar şəraitdə ölümlə nəticələnən yol-nəqliyyat hadisəsi törədərək qaçan sürücü rayonun polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində tutularaq istintaqa cəlb edilib. Abşeron Rayon Polis İdarəsinin və Rayon Prokurorluğunun daxil olan birgə məlumatında bildirilir ki, dekabrın 22-də saat 18 radələrində Abşeron rayonunun Qobu qəsəbəsi ərazisində “Yeni Qobu” avtomobil yolunun kənarı ilə hərəkətdə olan piyada 1940-cı il təvəllüdlü Əliyeva Xalidə Fətəli qızı naməlum sürücünün idarə etdiyi avtomobillə vurulub. Hadisə nəticəsində piyada ölüb. Piyadanın ölümünə səbəb olması və sürücünün hadisə yerindən qaçması faktına görə rayon polis idarəsinin istintaq şöbəsində Cinayət Məcəlləsinin 263.2-ci (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol-nəqliyyat hadisəsi yerindən qaçma) maddələri ilə cinayət işi başlanıb. Cinayət işi üzrə hadisə yerinə baxış keçirilib, zəruri ekspertizalar təyin olunub və digər təxirəsalınmaz istintaq hərəkətləri yerinə yetirilib. Həyata keçirilmiş təxirəsalınmaz istintaq hərəkətləri və əməliyyat-axtarış tədbirləri nəticəsində yol nəqliyyat hadisəsinin “Opel Vektra” markalı 10-UE-602 dövlət qeydiyyat nişanlı avtomobilin sürücüsü Zəkiyev Elnur Zabit oğlu tərəfindən törədilməsinə əsaslı şübhələr müəyyən edilib. Elnur Zəkiyev şübhəli şəxs qismində tutularaq istintaqa cəlb olunub.
DAVAM.AZ Geri dön |