davam.az - BÜTÖV AZƏRBAYCAN ADINA! > Hadisə > Gömrükçülər 3 fakt üzrə 10 kiloqramdan çox narkotik vasitə aşkarlayıblar
Gömrükçülər 3 fakt üzrə 10 kiloqramdan çox narkotik vasitə aşkarlayıblar |
|
Gömrükçülərin həyata keçirdikləri uğurlu əməliyyatlar nəticəsində 3 fakt üzrə 10 kiloqramdan çox narkotik vasitə və külli miqdarda güclü təsir edən maddə aşkar edilərək qanunsuz dövriyyədən çıxarılıb. Dövlət Gömrük Komitəsinin Mətbuat və İctimaiyyətlə Əlaqələr İdarəsindən bildirilib ki, komitənin Əməliyyat-İstintaq Baş İdarəsi Əməliyyat İdarəsinə İrandan qaçaqmalçılıq yolu ilə ölkəyə gətirilən külli miqdarda narkotik vasitələrin Aynur adlı şəxs tərəfindən realizə olunacağı barədə məlumat daxil olub. Dərhal yaradılan əməliyyat qrupu Daxili İşlər Nazirliyi Baş Narkotiklərlə Mübarizə İdarəsinin əməkdaşları ilə birgə Abşeron rayonu, Xırdalan şəhəri, “AAF-Park” yaşayış kompleksində yerləşən istirahət parkında əməliyyat keçirib və Azərbaycan vətəndaşı Məmmədova Aynurə Əlibala qızı şərti alıcı qismində çıxış edən əməliyyat müvəkkilinə narkotik vasitələri satarkən saxlanılıb. Komitənin Əməliyyat-İstintaq Baş İdarəsinin inzibati binasına gətirilən A.Məmmədovaya məxsus sellofan torbaya və qara rəngli çantaya baxış keçirilib. Yoxlama zamanı sellofan torbadan 4 kiloqram 55 qram narkotik vasitə - tiryək, qara rəngli çantadan isə 4 kiloqram 958 qram narkotik vasitə - həşiş aşkar edilib.
Cənub Ərazi Baş Gömrük İdarəsinin əməkdaşları 1 kiloqramdan artıq heroini aşkar edərək qanunsuz dövriyyədən çıxarıb. Belə ki, Biləsuvar gömrük postunda İrandan Azərbaycana piyada gələn Pakistan vətəndaşı Ahmad Kaleem Khan Ahmada məxsus çamadana piyada keçid xəttində olan “Heiman X-Ray” markalı rentgen yük yoxlama qurğusu vasitəsilə baxış keçirilərkən monitorda şübhəli cizgilər müşahidə olunub. Pakistan vətəndaşı şifahi sorğu-sual zamanı ona məxsus çamadanda gömrük nəzarətindən gizlədilən hər hansı predmetin, o cümlədən narkotik vasitələrin olmadığını bildirib. Lakin çamadanın yoxlanılması zamanı gömrükçülərin şübhələri və daxil olan əməliyyat məlumatı təsdiqini tapıb. Çamadanın alt divarı ilə astarının arasından, gömrük nəzarətindən gizlədilmiş - çamadanın alt divarına yapışqanlı lentlə bərkidilərək divar boyunca yerləşdirilmiş bir ədəd sellofan bağlamada, qablaşdırılması ilə birgə çəkisi 1 kiloqram 118 qram təşkil edən narkotik vasitə - heroin aşkar olunub. Şimal Ərazi Baş Gömrük İdarəsinin “Yalama” gömrük postunun əməkdaşları isə Rusiya istiqamətindən idxal gömrük nəzarəti zonasına daxil olan qatardan külli miqdara güclü təsir edən maddələr aşkar ediblər. 392 nömrəli “Rostov-Bakı” qatarına baxış keçirilən zaman 2-ci vaqonun 2, 3, 4 və 5-ci kupelərinin tavan hissəsindəki boşluqlarda gömrük nəzarətindən gizlədilmiş, ümumilikdə 650 ədəd flakonda “Güclü təsir edən maddələr və onların külli miqdarının siyahısı”na daxil olan dərman preparatları aşkar olunub. Araşdırma zamanı həmin maddələri 2-ci vaqonun bələdçiləri Sobolevskaya Karina Vajevna və Pravdyuk Mariya Sergeyevnanın gömrük nəzarətindən gizlədilərək ölkə ərazisinə keçirməyə cəhd göstərdikləri məlum olub. Hər 3 faktla bağlı araşdırma aparılır. DAVAM.AZ Geri dön |