davam.az - BÜTÖV AZƏRBAYCAN ADINA! > İslam dini > Ölkəmizdəki dini müxtəliflik və multikultural mühiti
Ölkəmizdəki dini müxtəliflik və multikultural mühiti |
|
Dini Qurumlarla İş üzrə Dövlət Komitəsinin (DQİDK) sədri Mübariz Qurbanlı Azərbaycanda keçirilən parlament seçkilərini müşahidə etmək məqsədilə ölkəmizə səfər edən bir qrup xarici siyasətçi və jurnalistlə görüşüb. Dövlət Komitəsindən bildiriblər ki, Mübariz Qurbanlı qonaqlara ölkəmizdə mövcud olan nümunəvi dövlət-din münasibətləri, Konstitusiyada təsbit edilmiş vicdan azadlığı, dinlərarası harmoniya, ayrı-ayrı dinlər və konfessiyalar arasında qarşılıqlı hörmət və etimada əsaslanan əməkdaşlıq münasibətləri haqqında, eləcə də bu münasibətlərin tənzimlənməsi sahəsində fəaliyyət göstərən Dini Qurumlarla İş üzrə Dövlət Komitəsinin fəaliyyəti barədə məlumat verib. Dövlət Komitəsinin sədri bildirib ki, Azərbaycan dünyəvi, demokratik, hüquqi dövlətdir və bu, Konstitusiyada öz əksini tapıb. Ölkəmizdə 35-i qeyri-müsəlman təmayüllü olmaqla, 941 dini icma dövlət qeydiyyatına alınıb, 2250-dən çox məscid, 14 kilsə, 7 sinaqoq fəaliyyət göstərir. Tarixən etnik-dini zənginliyi, tolerant və multikultural dəyərləri ilə seçilən Azərbaycan əhalisinin təxminən 96 faizini müsəlmanlar, 4 faizini xristianlar, yəhudilər, bəhailər, krişnalar və digər dinlərin mənsubları təşkil edir. Azərbaycanda pravoslav, katolik, lüteran və protestant, eləcə də tarixi Alban kilsəsinin mənsubları olan xristianlar yaşayırlar, həmçinin yəhudilər ölkəmizdə 8 icma ilə təmsil olunublar.
Görüş iştirakçıları ölkəmizdə parlament seçkilərinin mövcud qanunvericiliyə uyğun olaraq azad, demokratik, şəffaf şəraitdə keçdiyini bildiriblər. Onlar, eyni zamanda, Azərbaycandakı dini müxtəliflik, multikultural və həmrəylik mühitinə heyran qaldıqlarını bildirərək, dövlətimizin tarixən gələn tolerant dəyərlərin qorunması, təşviqi istiqamətində həyata keçirdiyi siyasəti təqdir etdiklərini qeyd ediblər. M.Qurbanlı qonaqların Azərbaycanın nümunəvi din siyasətinin uğurları, ölkəmizi xarici yad ideologiyaların təsirindən qoruma yolları və dini radikalizmə qarşı mübarizə istiqamətində görülən işlər barədə suallarını cavablandırıb. Dövlət Komitəsinin ingilis və rus dillərində nəşr etdirdiyi, ölkəmizdəki dini tolerantlıq mühiti, dinlərin tarixi və maddi-mədəni irsimizə qarşı törədilən erməni vandalizmindən bəhs edən kitablar qonaqlara təqdim olunub. Qeyd edək ki, görüşlərdə İsveçin “Nya Tider”, Fransanın “L'Incorrect”, Almaniyanın “Contact Magazine”, Polşanın “Mysl Polska”, İtaliyanın “II Sole 24”, Belçikanın “EU Observer” nəşrlərinin əməkdaşları, Polşa parlamentinin üzvü Katarzina Ueberhan, Rusiya Dövlət Dumasının üzvü Ramin Qasımov və Rusiya Federasiyası Dövlət Dumasındakı LDPR fraksiyasının rəhbərinin müşaviri Aleksey Bıçkov, “Dialogue for Europe” QHT-sinin rəhbəri Eli Hadzhieva iştirak ediblər. DAVAM.AZ Geri dön |