davam.az - BÜTÖV AZƏRBAYCAN ADINA! > Xəbərlər, Hüquq > Paytaxtda müvafiq icazə olmadan hərəkət edənlər cərimələnirlər
Paytaxtda müvafiq icazə olmadan hərəkət edənlər cərimələnirlər |
|
Daxili İşlər Nazirliyinin əməkdaşları koronavirusun geniş yayılmasının qarşısının alınması ilə bağlı dövlət tərəfindən həyata keçirilən tədbirlər çərçivəsində insanların fərdi evlərində və mənzillərində, daimi və ya müvəqqəti yaşadıqları (olduqları) yerlərdə qalmalarını tələb edirlər.
Bakı Şəhər Baş Polis İdarəsinin mətbuat xidmətindən bildiriblər ki, polis əməkdaşları və Daxili Qoşunların hərbi qulluqçuları paytaxtda müvafiq icazə olmadan hərəkət edən şəxsləri, eləcə də nəqliyyat vasitələrinin sürücülərini və sərnişinləri yoxlayırlar. Müvafiq icazəsi olmayan şəxslər müəyyən olunaraq, barələrində qanunvericiliyə uyğun tədbirlər davam etdirilir. İnsanların bir-biri ilə yaxın əlaqələrini minimuma endirmək, bununla da infeksiyaya yoluxmanın sürətini azaltmaq məqsədilə ölkə ərazisindəki xüsusi rejim müddəti martın 31-dən aprelin 20-dək gücləndirilib. İnsanların fərdi evlərindən və mənzillərindən çıxışına yalnız təxirəsalınmaz tibbi yardıma zərurət olduqda, həyat və sağlamlığa bilavasitə təhlükəli vəziyyət yarandıqda, fəaliyyətinə icazə verilən pərakəndə satış və əhaliyə xidmət göstərən obyektlərə gedildikdə, məişət tullantılarının atılması hallarında, eləcə də xüsusi rejim dövründə fəaliyyət göstərən təşkilatlarda xidməti vəzifələrini icra etmək məqsədilə icazə verilir. Pandemiya şəraitində vətəndaşlar təmkin və anlayış göstərməyə, karantin tədbirlərinə dəstək olmaq məqsədilə özünütəcrid qaydalarına riayət etməyə çağırılır. Geri dön |