davam.az - BÜTÖV AZƏRBAYCAN ADINA! > Çap səhifəsi > Silahlı Qüvvələrimiz Cənubi Qafqazda müasir hərbi texnika ilə təchiz edilmiş ən güclü ordudur

Azərbaycan Silahlı Qüvvələri bu gün Cənubi Qafqazda müasir hərbi texnika ilə təchiz edilmiş ən güclü ordudur. Silahlı Qüvvələrimizin müasir hərbi bilik və bacarıqlara yiyələnmiş şəxsi heyəti dövlətimizi və xalqımızı təhdid edən hər bir təcavüzkara yetərincə cavab vermək gücündədir.

Bu fikirlər Azərbaycan Silahlı Qüvvələrinin yaradılmasının 102-ci ildönümü münasibətilə Şəki Şəhər Gənclər və İdman İdarəsi tərəfindən təşkil edilən onlayn konfransda səsləndirilib.

Tədbirdə şəhər icra hakimiyyəti, Təhsil şöbəsi və Regional Mədəniyyət İdarəsinin fəal gəncləri, idmançılar iştirak ediblər.

Onlayn konfransda şəhər gənclər və idman idarəsinin rəisi Daşqın Mikayılov, Çernobıl veteranı İmran Salamov, şəhər icra hakimiyyətinin əməkdaşı Anar Məmmədov və başqaları çıxış edərək, Milli Ordunun yaradılması, möhkəmləndirilməsi və döyüş hazırlığının yüksəldilməsi sahəsində həyata keçirilən tədbirlərdən danışıblar. Bildirilib ki, 1993-cü ilin iyununda xalqın təkidli tələbi ilə yenidən hakimiyyətə qayıdan ümummilli lider Heydər Əliyevin həyata keçirdiyi məqsədyönlü tədbirlər nəticəsində Milli Ordu quruculuğu keyfiyyətcə yeni mərhələyə qədəm qoyub, qısa müddətdə vahid komandanlığa tabe olan nizami ordu formalaşdırılıb. Vurğulanıb ki, müstəqil dövlətçiliyimizin keşiyində ayıq-sayıq dayanan Milli Ordumuz bu gün işğal altında olan torpaqlarımızı Azərbaycan Prezidenti, Ali Baş Komandan İlham Əliyevin rəhbərliyi altında düşməndən azad etməyə tam hazırdır. Aprel döyüşləri bunu bir daha sübut etdi. Bu döyüşlərdə Azərbaycan əsgəri əsl qəhrəmanlıq, rəşadət nümayiş etdirdi.