davam.az - BÜTÖV AZƏRBAYCAN ADINA! > Çap səhifəsi > Orduda könüllü xidmət etmək üçün yüzlərlə füzulili qeydiyyata alınıb

İyulun 15-də Nazirlər Kabinetinin 2020-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında Prezident İlham Əliyevin çıxışından sonra yüzlərlə füzulili gənc Səfərbərlik və Hərbi Xidmətə Çağırış üzrə Dövlət Xidmətinin Füzuli rayon bölməsinə müraciət edərək, müvafiq qaydada qeydiyyata alınıb.

Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin çağırışına səs verərək orduda könüllü xidmət etmək haqqında arzularını ifadə edənlər arasında hərbi xidməti başa vurmuş, müxtəlif sahələrdə çalışan gənclər, ehtiyatda olan zabitlər, idmançılar, müharibə veteranları da var. Füzuli rayonunun işğaldan azad edilmiş ərazilərində yaşayan gənclər pandemiya dövrünün tələblərinə əməl olunmaqla Səfərbərlik və Hərbi Xidmətə Çağırış üzrə Dövlət Xidmətinin rayon bölməsində qeydiyyata alınır. Respublikanın digər şəhər və rayonlarında məskunlaşan füzulili məcburi köçkünlərin qeydiyyatı isə onlayn qaydada aparılır.