davam.az - BÜTÖV AZƏRBAYCAN ADINA! > Çap səhifəsi > Təhsil İnstitutu Azərbaycan Texniki Universiteti ilə əməkdaşlıq edəcək

Azərbaycan Respublikasının Təhsil İnstitutu (ARTİ) ilə Azərbaycan Texniki Universitetinin (AzTU) rəhbərlikləri arasında görüş keçirilib.

Bu barədə institutdan məlumat verilib. Görüşdə ARTİ ilə AzTU arasında əməkdaşlığın genişləndirilməsi və təcrübə mübadiləsi imkanlarının yaradılması üçün birgə tədqiqat işlərinin aparılması ilə bağlı fikir mübadiləsi aparılıb. Həmçinin AzTU-nun tələbə və məzunlarının elmi-tədqiqat işlərinin və innovasiyalarının tətbiqini genişləndirməsi, innovativ və yüksək texnologiyalara əsaslanan rəqabətqabiliyyətli xidmətlər göstərməsi üçün ARTİ ilə birgə tədbirlər həyata keçirilməsi müzakirə olunub.

Bundan əlavə, innovasiya fəaliyyətini stimullaşdıran elmi-tədqiqat təsisatlarının yaradılması istiqamətində tədbirlərin görülməsi, ixtiraların nümunəvi istehsalının aparılması üçün elmi-istehsalat birliklərinin yaradılmasının stimullaşdırılması, AzTU-da tədrisin keyfiyyətinə nəzarət üzrə qiymətləndirmə və monitorinq sisteminin qurulması imkanları, tədqiqat işlərinin aparılması və keyfiyyətinin artırılması və tədqiqatla bağlı tədrisin pillələri arasında əlaqələrin qurulması imkanları müzakirə edilib.

Görüşün sonunda sənaye ilə AzTU əməkdaşlığının gücləndirilməsi məqsədilə birgə 3 tədqiqat işinin aparılması, texnologiya transferi şöbəsinin fəaliyyətinə, sahibkarlıq mühitinin formalaşdırılmasına və tədqiqat menecerlərinin yetişdirilməsinə dəstək, həmçinin ARTİ tərəfindən icra olunan “STEAM Azərbaycan” layihəsi çərçivəsində tələbələrə təlimlər, layihələrin idarəolunması, mühəndislik kurikulumlarının təkmilləşdirilməsi, “SABAH” magistratura proqramının tətbiqinin davamlı monitorinqinin aparılması çərçivəsində əməkdaşlıq haqqında razılıq əldə olunub