davam.az - BÜTÖV AZƏRBAYCAN ADINA! > Çap səhifəsi > Ankaradakı tədbirdə Hüseyn Cavidin acı taleyindən danışılıb

Dekabrın 24-də Türkdilli Ölkələrin Mədəniyyət Təşkilatında (TÜRKSOY) və Ankaranın Keçiören Bələdiyyəsinin böyük teatr zalında xalqımızın unudulmaz şairi, görkəmli dramaturq Hüseyin Cavidin anadan olmasının 130 illiyi münasibətilə tədbirlər təşkil olunub.

TÜRKSOY-da təşkil olunmuş tədbirin açılış nitqini sözügedən təşkilatın Baş Katibinin müavini Fırat Purtaş həyata keçirib.
Ardından söz Azərbaycanın Ankaradakı səfiri Faiq Bağırova verilib. Səfir öz çıxışında ilk olaraq TÜRKSOY-a dərin minnətdarlığını bildirərək, məşhur dramaturqun acı taleyindən və Türk Dünyası üçün əhəmiyyətli olan yaradıcılığından danışıb. Daha sonra Naxçıvan Muxtar Respublikasının mədəniyyət və turizm nazirinin müavini Məhəmməd Həsənov, TR Mədəniyyət və Turizm Nazirliyindən Ahmet Arı və Qırğızıstan Yazıçılar İttifaqının dədri Ömər Sultanov çıxışlarında unudulmaz şairin yaradıcılıq fəaliyyəti və dahi şairin yeni nəsillərə anlatılması istiqamətində son 20 il ərzində həyata keçirilmiş işlərdən söz açıblar. Ardından, görkəmli dramaturq Hüseyin Cavidin həyat və yaradıcılığı ilə bağlı hazırlanmış sənədli film nümayiş etdirilib. Daha sonra dahi şair və məşhur dramaturqun yaradıcılığı ilə bağlı elmi konfrans öz işinə başlayıb. Heydər Əliyev Fondunun nümayəndəsi Məhəbbət Əliyeva, Avrasiya Yazıçılar İttifaqının sədri Yaqub Öməroğlu, yazıçı Azər Turan, Kazım Qarabəkir Fondunun sədri Timsal Qarabəkir, Turan Cavid Qadınlar Mərkəzinin Sədri Sevda Cəfərova və Azərbaycan Türkləri Mədəniyyət və Həmrəylik Fondunun sədri Erol Göllü elmi prezentasiyaları ilə dahi şairin yaradıcılığı haqda tədbir iştirakçılarını ətraflı şəkildə məlumatlandırıblar. Müğənni Eyyub Yaqubov və Vaqif Əsədov isə Hüseyin Cavidin əsərlərini şer və mahnı şəklində səsləndiriblər. Axşam saatlarında tədbirlərin davamı kimi, Ankaranın Keçiören Bələdiyyəsinin böyük teatr zalında dahi dramaturqun "İblis" əsəri, Naxçıvan Muxtar Respublikası Dram Teatrının əməkdaşları tətərfindən geniş tamaşaçı kütləsinə nümayiş etdirilib.