davam.az - BÜTÖV AZƏRBAYCAN ADINA! > Çap səhifəsi > Polşa Avropa İttifaqını Rusiyadan neft, qaz və kömür idxalını dayandırmağa çağırıb

Polşa Avropa İttifaqını (Aİ) Rusiyadan neft, qaz və kömür idxalını dayandırmağa çağırıb.

Polşanın Baş naziri Mateuş Moravietski bu barədə tələblə çıxış edib. O bildirib ki, ölkəsi Rusiyadan bu məhsulların idxalına birtərəfli qaydada embarqo qoya bilər, lakin bunun üçün Aİ tərəfindən Polşaya cəza tətbiq edilməyəcəyinə təminat verilməlidir, çünki sanksiya siyasəti Aİ qurumlarının səlahiyyətindədir.

Polşaya səfər edən Avropa Şurasının sədri Şarl Mişel mətbuat qarşısında Rusiyadan enerji daşıyıcılarının idxalına embarqo qoyulması sualına ehtiyatla yanaşıb. O bildirib ki, hazırda Rusiyaya qarşı qəbul edilmiş sanksiyalar tətbiq olunmalıdır.

Ş.Mişel digər sanksiyaların tətbiqini istisna etməyib, lakin onların mahiyyəti barədə də açıqlama verməyib.

Qeyd edilməlidir ki, Polşa enerji tələbatının mühüm hissəsini Rusiyadan alınan kömür hesabına ödəyir. Buna baxmayaraq Polşa Rusiyaya qarşı daha sərt sanksiyaların tətbiqini tələb edir və xüsusilə də öz iqtisadiyyatına zərbə vuracaq enerji sahəsində embarqolara tərəfdar çıxır.