“Çoxmilli müəssisələrin auditi” adlı tədbir 5 gün davam edəcək

Bu gün Bakıda İqtisadi Əməkdaşlıq və İnkişaf Təşkilatının (İƏİT) və Vergilər Nazirliyinin birgə təşkilatçılığı ilə “Çoxmilli müəssisələrin auditi” mövzusunda seminar öz işinə başlayıb. ANS PRESS-in Vergilər Nazirliyinin Analitik-informasiya şöbəsinə istinadən verdiyi məlumata görə, 5 gün davam edəcək seminarda, İƏİT katibliyinin, eləcə də Niderland və İsveç Krallıqlarının vergi orqanlarının ekspertləri, Azərbaycan, Türkiyə, Belarus, Niderland, İsveç, Ukrayna və Gürcüstanın vergi orqanlarının əməkdaşlarının nümayəndələri iştirak edirlər.

Seminarın açılış mərasimində tədbir iştirakçılarını salamlayan Azərbaycan Respublikasının vergilər nazirinin müavini, 3-cü dərəcəli dövlət vergi xidməti müşaviri Sahib Ələkbərov bu tədbirin ölkəmizdə keçirilməsindən məmnunluğunu ifadə edərək, Vergilər Nazirliyinin bir çox beynəlxalq institutlarla fəal əməkdaşlıq etdiyini diqqətə çatdırıb. O qeyd edib ki, qloballaşan dünyada transmilli şirkətlərin fəaliyyətinin sürətlə genişlənməsi onların vergi öhdəliklərinin düzgün müəyyən olunması məqsədilə auditin aparılması, vergilərin minimallaşdırılması və vergidən yayınma ilə mübarizə sahəsində səylərin gücləndirilməsi kimi məsələlərdə vergi orqanlarının birgə fəaliyyətini, təcrübə və məlumat mübadiləsinin genişləndirilməsini zəruri edir.

Tədbirdə İƏİT-in Qlobal Əlaqələr Departamentinin nümayəndəsi Ubaldo Qonzalez İƏİT Vergi Siyasəti və İnzibatçılığı Mərkəzinin fəaliyyəti barədə məlumat verib. Sonra İsveç Vergi Agentliyinin auditoru cənab Jan Montelius və Niderland Vergi və Gömrük Administrasiyasının auditoru cənab Peter Oostdijk çıxış ediblər. Açılış mərasimində “Çoxmilli müəssisələrin xüsusiyyətləri”, “Çoxmilli müəssisələrin vergiyə cəlb edilməsi” mövzusunda təqdimatlar edilib, Vergilər Nazirlyinin Vergi siyasəti və strateji araşdırmalar baş idarəsinin Strateji araşdırmalar idarəsinin rəisi İmran Qarayev tədbir iştirakçılarını ölkəmizin vergi sistemi və bu sahədə aparılan islahatlarla tanış edib.

İyun ayının 14-dək davam edəcək seminarda transmilli şirkətlərin vergiyə cəlb edilməsi, onlarda auditin aparılması, vergi planlaşdırması və vergi orqanları ilə əlaqələrin qurulması istiqamətində mövcud olan milli və beynəlxalq təcrübələr ətrafında müzakirələrin aparılması nəzərdə tutulur.