Yer kürəsi əhalisinin sayı bu ilin iyul ayında 7 milyard 200 milyon nəfərə çatacaq. BMT Əhali Fondunun iyunun 13-də açıqladığı məruzədə belə deyilir.

Fondun ekspertləri 2025-ci ildə planet sakinlərinin 8 milyard 100 milyona, 2100-cü ildə 10 milyard 900 milyona çatacağını proqnozlaşdırır.

Ekspertlərin fikrincə, mümkün qlobal fəlakətlər və ya əksinə, sürətli inkişaf nəzərə alınarsa, yüzilliyin sonuna Yer kürəsi əhalisinin sayı artaraq 16 milyard 600 milyona çata, yaxud azalaraq 6 milyard 800 milyona düşə bilər.

Məruzədə deyilir ki, əhalinin sabit artımı inkişaf etməkdə olan ölkələrdə müşahidə olunur. Son qiymətləndirməyə görə, bu ölkələrdə 5 milyard 900 milyona yaxın əhali yaşayır.