Dünən Türkiyə kubokunda III tura start verilib. Millimizin hücumçusu Cihan Özkaranın çıxış etdiyi “Sivasspor” öz meydanında II dəstə təmsilçisi “Ankaragücü” ilə qarşılaşıb.

Yığmamızın düşərgəsindən qayıtdıqdan sonra “Sivasspor”un Superliqa matçlarında “18-liy”ə belə düşməyən Cihan bu dəfə start heyətində yer alıb. O, qarşılaşmanı əvəzolunmadan keçirsə də, qol vura bilməyib. Halbuki 38 və 90-cı dəqiqələrdə buna yaxın olub.

Görüşə gəlincə, “Sivasspor”un son dəqiqələrdə vurduğu qol ilə oyunun əsas vaxtı 1:1 hesabı ilə başa çatıb. Matça əlavə olunmuş dəqiqələrdə təcrübə öz sözünü deyib və meydan sahibləri daha 2 qol vuraraq 3:1 hesabı ilə qələbə qazanıblar. Bununla da, “Sivasspor” 4-cü mərhələyə vəsiqə qazanıb.

Qeyd edək ki, “Sivasspor” bundan öncə “Bucak Bələdiyyə Oğuzhanspor”u 5:0 məğlub etmişdi. Həmin vaxtı 90 dəqiqə çıxış edən Özkara qollardan birini vurmuşdu.