Rusiyada “Moscow Open 2014” Beynəlxalq şahmat festivalı keçirilir
Rusiyada keçirilən “Moscow Open 2014” Beynəlxalq şahmat festivalının 3-cü turu başa çatdı. Məlumata görə, Azərbaycan təmsilçilərimiz festivalda uğurla çıxış edirlər.

Üçüncü turda B (qadınlar) turnirində mübarizə aparan təmsilçimiz Günay Məmmədzadə Rusiya şahmatçısı Yekaterina Ubinenik üzərində qələbə sayəsində üç xalla 1-8 yerləri bölüşdürərək əlavə göstəricilərə görə 3-cü yerdədir. İdmançımızın növbəti rəqibi beynəlxalq qrossmeyster Aleksandra Qoryaçkin olacaq.

F (tələbələr) turnirində iştirak edən Ülvi Bacarani yerli şahmatçı Dmitri Qordievski ilə xalları yarı bölüb. Məktəblilərin turnirində 9 yaşlı oğlanlar arasında mübarizə aparan Aydın Süleymanlı dörd oyundan sonra 3,5 xalla liderlər qrupundadır.

Şəbnəm Feyzullayeva isə 11 yaşlı qızlar arasında mümkün 4 xaldan 3,5 xal toplayaraq 6-cı pillədə qərarlaşıb.

Uşaqların turnirində (C turniri) iştirak edən şahmatçılarımızdan Səbuhi Xosrovov aktivində 1 xal var.

Festival fevralın 10-da başa çatacaq.