Martın 5-də İsrail ordusu bəyanat yayaraq Qəzza zolağındakı “Həmas” qruplaşmasına silah və hərbi sursat daşıyan İran gəmisini dayandırdığını bildirib.

İsrail ordusunun sözçüsü Piter Lerner jurnalistlərə deyib ki, Qırmızı dənizdə Panama bayrağı altında üzən İran gəmisi ələ keçirildikdən sonra ölkə sahillərinə döndərilib: “Saxlanan İran gəmisində 160 kilometr məsafəni qət edən onlarla “M-302” raketi və digər silahlar olub.

Suriyada istehsal olunan bu silahlar əvvəlcə İrana, sonra isə İraqa daşınaraq Sudana yola salınıb. Silahlar Sudana çatsaydı, böyük ehtimalla quru yollarla Misir torpağından Qəzza zolağına göndəriləcəkdi. Belə olan halda isə İsrail ərazilərinin böyük bir hissəsi ciddi təhlükə ilə üz-üzə qala bilərdi”.

İsrail ordusunun bildirdiyinə görə, İran gəmisinin heyəti ayrı-ayrı ölkələrin vətəndaşlarıdır.