İsrailin ITON-TV internet-kanalının “Uçuşların təhlili” verilişində bu dövlətin xarici işlər naziri Aviqdor Libermanın Azərbaycana səfəri, Azərbaycan ilə İsrail arasındakı münasibətlər, Cənubi Qafqaz regionundakı geosiyasi proseslər geniş şərh edilmişdir.
Beynəlxalq münasibətlər sahəsində ekspert olan Arye Qut ITON-TV kanalı jurnalistlərinin Aleks Valdman və Mixail Qorinin suallarına cavabında bildirmişdir ki, İsrailin xarici işlər naziri Aviqdor Liberman artıq beşinci dəfədir Azərbaycana səfər edir.
Ekspert demişdir: “Azərbaycan-İsrail münasibətləri çiçəklənir və yüksək inkişaf səviyyəsindədir. İsrail başa düşür ki, Azərbaycan Cənubi Qafqazda geosiyasi və geoiqtisadi proseslərin şəksiz lideridir. Azərbaycan regionun lider dövləti kimi özünü tam təsdiq etmişdir. Onun iştirakı olmadan Cənubi Qafqazda heç bir geosiyasi və geoiqtisadi layihəni həyata keçirmək mümkün deyildir.
İsrail Azərbaycanın çoxşaxəli xarici siyasətində əhəmiyyətli yer tutur”.
A.Qutun fikrincə, Azərbaycan xarici siyasətdə müstəqil davranışı ilə sübut etmişdir ki, dünyanın heç bir ölkəsi ona diqtə edə bilməz.
Azərbaycanda yaşayan 20 minlik yəhudi icmasına mehriban və səmimi münasibət bəslənilməsində Azərbaycan Prezidenti İlham Əliyevin və ölkənin birinci xanımı, Heydər Əliyev Fondunun prezidenti Mehriban Əliyevanın rolunu yüksək qiymətləndirən ekspert demişdir: “Azərbaycanda antisemitizm yoxdur və heç vaxt olmamışdır. Azərbaycan tolerantlıq siyasəti yeridir və ərazilərinin 20 faizinin Ermənistan tərəfindən işğal edilməsinə baxmayaraq, həqiqi sivilizasiyalararası dialoq nümunəsi, bütün xalqların və dini konfessiyaların nümayəndələrinin dinc, yanaşı yaşadıqları ölkədir. Qırmızı Qəsəbə dünyada yəhudilərin sıx yaşadıqları yeganə və unikal yerdir. Azərbaycan Prezidentinin və birinci xanımının himayəsi ilə son dörd ildə ölkədə iki sinaqoqun və Cənubi Qafqazda ən böyük yəhudi təhsil mərkəzinin inşa edilməsi faktının özü, əslində, çox şeydən xəbər verir”.
İsrail analitikinin fikrincə, Azərbaycan-İsrail münasibətləri hər iki ölkə və xalq üçün mühüm strateji xarakter daşıyır. O, demişdir: “İsrail dünya bazarında Azərbaycan neftinin əsas alıcılarından biri, Azərbaycanın neft-qaz, telekommunikasiyalar, kənd təsərrüfatı sahələrinin ən qabaqcıl texnologiyalarla təchiz edilməsində onun mühüm strateji tərəfdaşıdır”.
Ekspertin fikrincə, Azərbaycan, heç şübhəsiz, Cənubi Qafqaz regionunun geosiyasi və geoiqtisadi lideridir, özü də təkcə zəngin neft-qaz ehtiyatları sayəsində deyil. A.Qut demişdir: “Həqiqətən də Azərbaycan karbohidrogen ehtiyatları ilə zəngin olan digər ölkələrdən fərqli olaraq, bu sahədən əldə etdiyi gəlirləri daha geniş məqsədlərə yönəltmişdir. Postsovet Azərbaycanı Cənubi Qafqazda və Yaxın Şərqdə mühüm rol oynadığını isbat edə bilmişdir”.
A.Qut vurğulamışdır ki, çətinliklərə baxmayaraq, Azərbaycan mühüm beynəlxalq aktorlara həmişə yol tapmışdır. İsrail analitiki fikirlərini bu sözlərlə yekunlaşdırmışdır: “Azərbaycanın praqmatik yanaşması, dini dözümlülüyü, dünyanın bir çox digər hissələri ilə müqayisədə diplomatiyanın xeyli dərəcədə daha mürəkkəb olduğu bir regionda öz qonşuları ilə konstruktiv münasibətləri onun uğurla inkişaf etməsində öz rolunu oynamışdır”.