Nazirlər Kabineti beynəlxalq kompleks yarışlarında mükafat yerləri tutan idmançıların və onların məşqçilərinin mükafatlandırılması qaydasını təsdiqləyib.

Beynəlxalq kompleks yarışlarına Tələbələrin Ümumdünya Universiadası, Avropa Oyunları, Ümumdünya Şahmat Olimpiadası, İslam Həmrəylik Oyunları, Yeniyetmələrin Olimpiya Oyunları, Gənclərin Olimpiya Həftəsi yarışları daxil edilib.

Tələbələrin Ümumdünya Universiadası, Avropa Oyunları, Ümumdünya Şahmat Olimpiadası, İslam Həmrəylik Oyunları, Yeniyetmələrin Olimpiya Oyunları, Gənclərin Olimpiya Həftəsi yarışlarında mükafat yerləri tutan idmançıların və onların məşqçilərinin mükafatlandırılması Azərbaycan prezidentinin xüsusi sərəncamı ilə həyata keçirilə bilər. Mükafatlandırılması barədə Azərbaycan prezidentinin xüsusi sərəncamı olmadığı təqdirdə, həmin idmançılar və onların məşqçiləri Nazirlər Kabineti tərəfindən təsdiqlənən “Olimpiya Proqramına daxil olan idman növləri üzrə Dünya və Avropa çempionatları və Kubok yarışlarında ən yüksək nəticələr göstərmiş Azərbaycan Respublikasının idmançıları və onların məşqçiləri üçün mükafatlar” cədvəlinə əsasən Avropa Çempionatında ən yüksək nəticələr göstərmiş idmançılar və onların məşqçiləri üçün müəyyən edilmiş mükafatlara uyğun mükafatlandırılacaqlar.

Xatırladaq ki, “Olimpiya Proqramına daxil olan idman növləri üzrə Dünya və Avropa çempionatları və Kubok yarışlarında ən yüksək nəticələr göstərmiş Azərbaycan Respublikasının idmançıları və onların məşqçiləri üçün mükafatlar” cədvəlinə əsasən, Avropa Çempionatında birinci yeri tutmuş idmançı və onun məşqçisinin müvafiq olaraq 10000 manat və 5000 manat, ikinci yer üzrə 6000 manat və 3000 manat, üçüncü yer üzrə 2000 manat və 1000 manat məbləğində mükafatlandırılması nəzərdə tutulub.