İyunun 8-i Kanadanın paytaxtı Ottavanın Minto parkında Azərbaycanın Milli Qəhrəmanı Mübariz İbrahimovun xatirəsinə həsr olunmuş ağacın və məlumat lövhəsinin açılış mərasimi keçirilib. Təşəbbüs Azərbaycan icmasından gəlib.

Azərbaycanın Kanadadakı səfirliyindən verilən məlumata görə, icma fəallarından Yaşar Muğan ölkənin ərazi bütövlüyü və suverenliyi uğrunda şəhid olmuş Mübariz İbrahimov haqqında danışıb, onun qəhrəmanlığının gənclər üçün gözəl örnək olduğunu vurğulayıb. Mərasimdə Azərbaycanın Kanadadakı səfirliyinin əməkdaşları da iştirak edib.

Gizir Mübariz İbrahimov 2010-cu ilin iyunun 19-na keçən gecə Tərtərin Çaylı kəndi istiqamətində şəhid olub. Onun meyiti Azərbaycana 2010-cu il noyabrın 6-da təhvil verilib. 7 noyabr 2010-cu ildə şəhid İkinci Fəxri xiyabanda dəfn olunub. Ölümündən sonra Mübariz İbrahimova Azərbaycanın Milli Qəhrəmanı adı verilib.