Nurməhəmməd Hacıyevin növbəti rəqibi ukraynalı Mraz Cafaryandır
Azərbaycanın iki güləşçisi Avropa çempionatının yarımfinal mərhələsinə yüksəlib.

Polşanın Katovitse şəhərində keçirilən gənclər arasında güləş üzrə Avropa çempionatının ikinci günündə 55, 66, 84 və 120 kiloqram çəki dərəcələrində sərbəst güləşçilər mübarizə aparırlar.

Çempionatda 66 kiloqram çəki dərəcəsində mübarizə aparan idmançımız Murad Süleymanov rumıniyalı İon Plopa və yunanıstanlı Binenbaoum Kirillosa qalib gələrək yarımfinala yüksəlib.

Yarımfinalda idmançımızın rəqibi belaruslu Surko Raşitxanov olacaq.

Digər güləşçimiz Nurməhəmməd Hacıyev (84 kq) də yarımfinala vəsiqə qazanıb.

N.Hacıyev Bolqarıstan təmsilçisi Mladen Vasilev və Moldova güləşçisi Oktavian Staviladan üstün olub. İdmançımızın növbəti rəqibi ukraynalı Mraz Cafaryandır.