ABŞ-ın müdafiə katibi Çak Heygel və Ukraynanın müdafiə naziri Valeri Qeletey arasında telefon danışığı olub.

ABŞ Müdafiə Departamentinin rəsmi saytınına yaydığı xəbərə görə, bu barədə Pentaqonun mətbuat katibi Con Kirbi məlumat verib.

Mətbuat katibi iki ölkənin müdafiə nazirinin Rusiyanın Şərqi Ukraynaya göndərilən humanitar yardımdan bəhanə kimi istifadə edərək, bu ölkəyə hərbi müdaxilə etməyəcəyi ilə əlaqədar Rusiya müdafiə naziri Sergey Şoyqunun açıqlamasını müzakirə etdiklərini bildirib: “Heygel rusiyalı həmkarının yardım konvoyu ilə bağlı açıqlaması və zəmanət verməsini ukraynalı həmkarına çatdırıb. Cənab Qeletey Rusiyanın hərbi dəstəyi ilə Ukraynanın şərqində artan zorakılığı, son zamanlar mülki əhalinin qətlə yetirilməsi və yaralanması hallarının artması ilə bağlı məsələləri müdafiə katibinin diqqətinə çatdırıb”.

Con Kirbi rəsmilərin ABŞ-ın Ukraynaya hərbi yardım göndərilməsinin davam etdirilməsi məsələsini müzakirə etdiklərini, Ukrayna müdafiə nazirinin ABŞ hökumətinə göstərdiyi dəstək üçün təşəkkür etdiyini bildirib.