Akademik Arif İsmayılzadənin əsərlərinin
biobiblioqrafik göstəricisi çapdan çıxıb
Ölkəmizin ən nüfuzlu elm məbədi olan Azərbaycan Milli Elmlər Akademiyasının Mər­kəzi Elmi Kitabxanası “Azərbaycanın Elm və Mədəniyyət Xadimləri” seriyasından AMEA-nın həqiqi üzvü, geologiya-minerologiya elmləri doktoru, Əməkdar elm xadimi, Azərbaycanın əməkdar geoloqu Arif Cəfər oğlu İsmayılzadənin elmi əsərlərinin biobiblioqrafik göstəricisi çapdan çıxıb. Göstəriciyə akademikin Azərbaycan və xarici dillərdə çap olunmuş monoqrafiya və kitabları, nəşr olunmamış elmi əsərləri, müxtəlif məcmuələrdə və dövri mətbuatda dərc olunmuş məqalələri, elmi konqres, sessiya, simpozium, konfrans, müşavirələrdə çıxış və məruzələri daxil edilmişdir.
Filologiya elmləri doktoru Aybəniz Əliyeva-Kəngərlinin elmi redaktorluğu ilə nəşr olunan biobiblioqrafiyada akademikin həyat və fəaliyyətinin əsas tarixləri, elmi, pedoqoji, təşkilati və ictimai fəaliyyəti haqqında qısa oçerk, alim haqqında yazılan məqalələr, onun elmi rəhbərliyi ilə müdafiə edilmiş dissertasiyalar əks olunmuşdur.
Göstəriciyə daxil edilmiş materiallar müvafiq bölmələr üzrə xaronoloji qaydada yerləşdirilmişdir. Biobiblioqrafik göstəricidən istifadəni asanlaşdırmaq məqsədilə kitabın sonunda informasiya-axtarış aparatı təqdim olumuşdur. Bura alimin əsərlərinin, həmmüəlliflərinin və onun haqqında yazan müəlliflərin əlifba göstəriciləri daxildir.
Rəşad Sahil
AMEA Mərkəzi Elmi Kitabxanasının
İctimaiyyətlə əlaqələrə məsul əməkdaşı