Əli Hüseynli: "İnsan hüquqları üzrə işçi qrupunun fəaliyyətinin bərpasının faydası Azərbaycan cəmiyyəti, dövləti, vətəndaşları üçündür"

Bunu, sözügedən işçi qrupunun üzvü, Milli Məclisin Hüquq siyasəti və dövlət quruculuğu komitəsinin sədri Əli Hüseynli deyib.

2005-2008-ci illərdə fəaliyyət göstərmiş, Azərbaycan vətəndaş cəmiyyətinin və hakimiyyətinin nümayəndələrindən ibarət birgə işçi qrupu Azərbaycan Prezidenti İlham Əliyevin və Avropa Şurasının baş katibi Torbyorn Yaqlandın təşəbbüsü ilə fəaliyyətini bərpa edib.


Ə.Hüseynli xatırladıb ki, bir neçə il bundan əvvəl hökumət, parlament və vətəndaş cəmiyyəti nümayəndələrindən ibarət bu cür işçi qrupu mövcud idi: "O zaman da işçi qrupu insan hüquqları sahəsində mövcud olan problemlərin birgə müzakirəsi ilə bağlı memorandum imzalamışdı. Bir müddət həmin işçi qrupu mandatına uyğun olaraq fəaliyyət göstərdi və çox da əhəmiyyətli işlər görülmüşdü. Sonradan işçi qrupunun fəaliyyəti müvəqqəti olaraq dayandırılmışdı və bunun da səbəbi bizim həyata keçirdiyimiz işlərə Avropa Şurasının bəzi təsisatları, o cümlədən məruzəçilərin mane olması idi. İndi isə biz bu formatı daha geniş şəkildə bərpa etmişik".

Deputatın sözlərinə görə, bu qrupda həm hakimiyyət nümayəndələri, həm də vətəndaş cəmiyyəti daha geniş təmsil olunur: "Mən bunu işçi qrupu yox, daha çox əməkdaşlıq qrupu adlandırardım. Bunun məqsədi hansısa dövlət orqanının işini əvəz etmək deyil, çünki insan haqlarının qorunması dövlətin ali məqsədidir, bununla bağlı xüsusi qurumlar var, Ombudsman var, məhkəmələr insan hüquqlarının pozulması ilə bağlı işlərə baxır. Burada bizim məqsədimiz Azərbaycanda vətəndaş cəmiyyətinə əhəmiyyət verməyimizdir, qeyri-hökumət təşkilatlarının rolunu qeyd etməkdir və hakimiyyət nümayəndələri ilə qeyri-hökumət təşkilatları arasında təmasın daha sıx olmasıdır. Yəni daha sıx təmas mexanizmidir. Biz bir katiblik yaratmışıq, mən özüm də orada millət vəkili qismində yox, Azərbaycan Hüquqşünaslar Konfederasiyasının sədri kimi təmsil olunuram. Katibliyin rəhbəri vətəndaş cəmiyyətinin nümayəndəsidir. Beləliklə, insan hüquqları ilə bağlı meydana çıxan, müzakirə oluna bilən, yəni istənilən bir məsələ hakimiyyət nümayəndələrinin diqqətinə operativ şəkildə çatdırılacaq. Bu qrupun əhəmiyyəti bundan ibarətdir və fəaliyyət sahəsi də kifayət qədər genişdir".

Ə.Hüseynli daha sonra deyib: "Bir daha vurğulayım ki, o zaman qrupun fəaliyyəti ona görə dayandı ki, bizim məşğul olduğumuz məsələlərdən biri də məhkumların azad olunması ilə bağlı humanitar aspekt idi və Avropa Şurasında yenidən qondarma siyasi məhbus mövzusunu meydana atdılar. Əlbəttə ki, belə formatda əməkdaşlıq artıq heç bir effekt vermirdi. Amma biz özümüz düşündük ki, nə Avropa Şurasının, nə də başqa beynəlxalq təşkilatların dediyi qeydlərə, tənqidlərə əhəmiyyət verməliyik, Azərbaycanın vətəndaş cəmiyyətində kifayət qədər sağlam düşüncəli insanlar var, onlar bəzən hakimiyyəti də, həyata keçirilən işləri də tənqid edirlər, amma Azərbaycanın dövlətçiliyi məsələsində, milli təhlükəsizlik məsələsində onların çox ciddi mövqeləri var. Və biz qərara gəldik ki, bütün bunlara baxmayaraq geniş spektrdə vətəndaş cəmiyyəti ilə əməkdaşlıq etməliyik və bunun faydası ancaq Azərbaycan cəmiyyəti, Azərbaycan dövləti, Azərbaycan vətəndaşları üçündür. Yəni beynəlxalq təşkilatların hansısa bir rəyi, fikri ikinci dərəcəlidir. Ən başlıcası odur ki, əgər hansısa cəmiyyətdə bir fikir varsa, vətəndaş cəmiyyəti, qeyri-hökumat təşkilatı bir problemi qaldırırsa, ona çevik reaksiya vermək mümkün olsun".

Millət vəkili Fərəc Quliyev İnsan hüquqları üzrə işçi qrupunun fəaliyyətinin bərpasını cəmiyyətdə barışa söykənən sabitlik üçün cox əhəmiyyətli element kimi qiymətləndirdi..

Fərəc Quliyev: - Cəmiyyətdə barışa söykənən sabitlik üçün bu cox əhəmiyyətli elementdir.

- Fərəc Bəy, İnsan hüquqları üzrə işçi qrupunun fəaliyyətinin bərpasına münasibətiniz necədir ?

Bilirsiniz ki, Azərbaycan vətəndaş cəmiyyətinin və hakimiyyətinin nümayəndələrindən ibarət birgə işçi qrupu 2005-2008-ci illərdə fəaliyyət göstərmişdir. İşçi qrupu insan hüquqları sahəsində mövcud olan problemlərin birgə müzakirəsi ilə bağlı memorandum imzalamışdı. Bir müddət həmin işçi qrupu mandatına uyğun olaraq fəaliyyət göstərdi və çox da əhəmiyyətli işlər görülmüşdü. Bu formatın daha geniş şəkildə bərpa olunması Azərbaycanın beynəlxalq hüquqdan irəli gələn fundamental dəyrlərə sayğısının göstəricisidir.

- Bəs işçi qrupunun fəaliyyəti müvəqqəti olaraq dayandırılması nə ilə bağlı idi ?

Əsas səbəb həyata keçirilən işlərə Avropa Şurasının bəzi təsisatları, o cümlədən məruzəçilərin mane olması oldu,bəzi təsisatların qərəzli münasibəti,ikili standartlar deyilən yanaşmaları,görülən ışlərə kölgə salma cəhdləri işi dayandırdı.

- İnsan hüquqları üzrə işçi qrupunun fəaliyyətinin əsas istiqamətləri necə olacaq ?

Məqsəd hakimiyyət nümayəndələri ilə qeyri-hökumət təşkilatları arasındabirgə müzakirə və ortaq davranış modelini qurmaqdır,. Bu təmas mexanizminin faydası Azərbaycan cəmiyyəti üçün əvəzolunmazdır.
Cəmiyyətdə barışa söykənən sabitlik üçün bu cox əhəmiyyətli elementdir. Üstəlik, Avropa Şurasının, başqa beynəlxalq təşkilatların dediyi qeydlərə, tənqidlərə münasibət də nə ayrılıqda hökumətin, nə də ayrılıqda insan hüquqları təşkilatlarının, qeyri-hökumət təşkilatlarının deyil, Azərbaycan cəmiyyətinin olacaq, haqlı tənqidlər də birgə müzakirələrin nəticəsində dəyərləndiriləcək. Bu addımlar Azərbaycanın heç kimlə, o cümlədən Avropa təsisatları ilə qarşılıqlı hörmətə söykənən əməkdaşlıqdan imtina etmədiyinin bariz nümunəsidir.