Bu gün Bakıda “Nizami” Kino Mərkəzinin təntənəli açılış mərasimi keçirilib. APA-nın məlumatına görə, açılış mərasimi çərçivəsində Kino Mərkəzinin qarşısında Nəfəsli Alətlər Orkestrinin ifasında Azərbaycan mahnıları ifa olunub. Eləcə də mərkəzin qarşısında quraşdırılmış böyük ekranda Azərbaycan kino tarixinə qızıl hərflərlə yazılmış və bu günümüzdə də sevilə-sevilə izlənilən filmlərdən fraqmentlər nümayiş etdirilib.

Kino Mərkəzinin açılış mərasimində çıxış edən mədəniyyət və turizm naziri Əbülfəs Qarayev bu hadisəni Azərbaycan kino tarixi üçün böyük hadisə kimi qiymətləndirib: “Bu məkan kinoteatr deyil, Kino Mərkəzi statusunda fəaliyyətini davam etdirir. Bu gün bu möhtəşəm Kino Mərkəzin açılışını həyata keçiririk və bu kino bayramı hesab olunur. Sabahdan başlayaraq, Kino Mərkəzində filmlərin nümayişinə başlanılacaq. Hələlik, gün ərzində bir dəfə kino nümayiş etdiriləcək və bu sırada uşaq filmləri də olacaq. Mərkəzin çox uğurlu şəkildə fəaliyyət göstərəcəyinə inanıram. Ümumiyyətlə, bu cür addımlar Azərbaycan kinosunun gələcək inkişafına xidmət edir”.

“Nizami” Kino Mərkəzinin açılışında Azərbaycanın tanınmış kino işçiləri, sevilən aktyorlar iştirak ediblər. Sənətçilər müxtəlif personajlarda tamaşaçıları Kino Mərkəzinin girişində qarşılayıblar.

Açılış mərasimindən sonra 3D formatında “Konan barbar” filmi nümayiş etdirilib.