Matç “Kayserispor”un 2-1 hesablı qələbəsi ilə başa çatıb
Türkiyə kubokunun qrup mərhələsində ilk turun oyunlarına start verilib.

“Fənərbaxça” Şükrü Saracoğlu stadionunda “Kayserispor”u qonağ edib.

“E” qrupunda yer alan “sarılacivərdlilər”ə gəlmə komandanın müqavimətini qırmaq üçün 30 dəqiqə bəs edib. Oyunda hesabı Caner Kosa açıb. O, Bruno Alveşin cərimə meydançasına asmasından sonra topu başla Denizin qoruduğu qapının yaxın küncündən keçirərək “Fənərbaxça”nı hesabda irəli çıxarıb. “Kayserispor”un cavabı özünü çox gözlətməyib. Matçın 39-cu dəqiqəsində sol cinahda müdafiəçidən sıyılan Turqut Doğan Şahin topu qövsvari trayektoriya ilə Güney Mertin qoruduğu qapının uzaq küncündən keçirib.

Fasilədən sonra da matç başabaş mübarizədə keçib. Hücumlardan birində istanbullu futbolçu Abdullahla kobud davranıb və bu kobudluq “Fənərbaxça”ya baha başa gəlib. 89-cu dəqiqədə İbrahim Dağaşanın cərimə zərbəsindən sonra Hakanı üstələyən Marko Simiç topu başla qapının uzaq küncünə yönəldərəy “Kayserispor”u hesabda irəli çıxarıb. Beləliklə matç “Kayserispor”un 2-1 hesablı qələbəsi ilə başa çatıb.