Təbrizin məşhur “Traxtur” futbol takımından yeni xəbər var. Məlumata görə, komandaya yeni oyunçu qoşulub, komandadan uzaqlaşdırılan oyunçular isə geri dönüb.
Məlumatda bildirilir ki, Seyid Mehdi Qureyşi “Traxtur”a qoşulub və Ditmar Bikacı əvəz edib.

S.M.Qureyşi bundan öncə “Maşinsazi” və “Qostəreşe fulad” komandalarında oynayıb. O keçən il “Qostəreşe fulad” takımında hazırda “Traxtur”un baş məşqçisi (murəbbi) olan Rəsul Xətibinin yetirmələrindən (sagird) olub.

Həmçinin “Traxtur”un baş məşqçisi Rəsul Xətibi keçən həftələrdə komandadan uzaqlaşdırdığı Möhsün Dəlir və Şəhriyar Şirvəndi bağışlayıb, onlar artıq komandaya qayıdıblar. Lakin baş məşqçinin bağışlaması həmin oyunçularla birlikdə komandadan uzaqlaşdırılan Hamid Ləkə şamil edilməyib və onun vəziyyəti hələlik qeyri-müəyyən olaraq qalır.