31 dekabr Yeni il təqvimi olmaqla yanaşı Azərbaycan xalqı üçün çox önəmli bir tarixi özündə əks etdirir. O taylı-bu taylı həsrətlərin qovuşduğu, qardaşın bacıya, bacının qardaşa tamarzı qaldığı bu ayrılıq sonunda sərhəddlərin yıxılmasına gətirib çıxardı. İnsanların daşa bükülmüş məktublarla bir-birlərinə ünvanladıqları həsrətin qarşısını tikanlı məftillər belə saxlaya bilmədi. Bu qəzəb bir ölkəni ikiyə bölən sərhəddə deyildi, iki İmperiyaya qarşıydı. Və insanlar bunun fərqindəydilər. Ürəkləri parçalayan ayrılığın əllərini tikanlı məftillər parçalasa da bunu sonlandırmağı 31 dekabr tarixində millətimizin övladları bacardı!
Azərbaycan xalqı üçün bu tarixin özəlliyi bundadır. İkiyə bölünən bir xalqın qəzəbinin iki imperiyanı əzib keçməsində.
Nə gözəl ki, bu tarix məhz yeni ilə təsadüf edir. Yeni ilsə yeni ümidlər, yeni arzular deməkdir. Hər yeni təqvimin səhifələrində köhnələn ümidlər yenilənir. İnam artır və bu inam öz arxasınca uğurları gətirir. Bizim inamımız, ümidlərimiz 2012-ci ildə Qarabağ yaramızın sağalması, Bütöv Azərbaycan eşqinədir. Tanrı türklüyümüzü, millətsevərliyimizi qorusun və bütün xalqımızı Yeni İldə dərdlərinin sağalması ilə mükafatlandırsın. Bu diləklərlə hər birinizin Həmrəylik Gününü və Yeni il bayramını təbrik edir, gözəl bir il arzu edirik.

Yenidən həmrəy olmaq diləyilə
“Davam”çılar