Bakı-Şamaxı-Ağsu və Şamaxı-Muğanlı-İsmayıllı və Şamaxı-Pirqulu avtomobil yolunda bu gün nəqliyyatın hərəkəti qismən bərpa olunub.

Yağan qarın dayanması və havaların normallaşması ilə əlaqədar olaraq bu gün səhər saatlarından yolda avtomobillərin hərəkəti müşahidə olunmağa başlayıb. Bununla belə sərnişin mikroavtobusları üçün bu yolla hərəkətə qoyulmuş məhdudiyyət qalmaqdadır. Axşam saatlarınadək yolda hərəkətin tam bərpası üçün işlər aparılır.

Ötən gün yağan qar nəticəsində Bakı-Şamaxı-Ağsu və Şamaxı-Muğanlı magistralında Ağsu aşırımı, Muğanlı, həmçinin Mərəzə və Cəngi aşırımlarında yol tamamilə buz bağlayıb.

Dövlət Yol Polisi Bakıdan ölkənin qərb rayonlarına gedən sərnişin avtobuslarının Bakı-Kürdəmir-Qazax yolundan istifadə etməsini tövsiyə edir.