Türkiyənin Balıkesir vilayətinin Bandırma şəhərində "Erməni soyqırımı” yox, Xocalı soyqırımı var" adlı konfrans keçiriləcək. Bu barədə Türkiyə mətbuatı məlumat verir.

Məlumata əsasən, 24 fevralda keçirilməsi nəzərdə tutulan konfransda Türkiyənin Milliyyətçi Hərəkat Partiyasının (MHP) deputatlarının iştirakı gözlənilir.

Qeyd edək ki, Türkiyənin İzmit şəhərində Xocalı faciəsi qurbanlarının xatirəsinə abidə ucaldılacaq. İzmit bələdiyyə başçısı bildirib ki, Azərbaycanla bağlı həqiqətlərin dünyaya çatdırılması üçün bundan sonra da hər cür fəaliyyət göstərəcəklər.

Abidənin üzərində Xocalı faciəsi zamanı qətlə yetirilən insanların adları yazılacaq.

Bundan əlavə, Türkiyənin Tekirdağ vilayətində Xocalı soyqırımının 23 illiyi ilə əlaqədar aksiya keçiriləcək. Aksiya Tekirdağ bələdiyyəsi tərəfindən təşkil ediləcək.

Aksiya zamanı Xocalı faciəsini əks etdirən fotostendlər qurulacaq və iştirakçılara faciənin videogörüntüləri nümayiş olunacaq.