CNN xəbər telekanalı “Urmu Gölünün ölümü” adlı raportajda Orta doğunun ən böyük ətraf-mühit böhranını nümayiş etdirib.
Məlumata görə, nüfuzlu CNN Telekanalının fotoqrafı Meysəm Mir Zendedel Güney Azərbaycanda Urmu gölü böhranını işıqlandırıb.

M.M.Zendedel raportajda deyir:

“Buraxılmış gəmilər, vaxtı ilə orada su olduğunu göstərən təkcə əlamətdir. Yaşayış məntəqləri və uşaqların oynadığı yerlər hazırda toz, torpaq və duzla örtülüb. Hələ də bəzi insanlar bu yerlərdə yaşayır, lakin sakinlərin əksəriyyəti ətraf kəndlərə köçüb və öz əkin yerlərini buraxıblar!”

Fotoqraf sözlərinin davamında bildirib: “Duzlaqda səssizcə yol gedərkən yalnız duz kristallarının qırıldığı eşidilir. Mən burada su səsinin əhali həyatından xəbər verdiyi günləri hələ xatırlayıram. Lakin hazırda bu gölü sükut bürüyüb və bu çox məyusedicidir.”